Niat ka MBoSE sha ki bor pyniaid skul ba lait tuh ki jingkylli

Shillong, 26 Naiwieng:
Ka Meghalaya Board of School Education (MBoSE) ka la niat bad sait met ia ka jinglait tuh ki jingkylli sha ki bor pyniaid skul bad ka la byrthen ban pynngat da ka jingpynshitom kaba tyngeh ia kiba donkti ha kane ka kam haba ki jingkylli ki la lait tuh ha ki skul ha Jowai bad ruh ha Shillong.
Haba kren mynta ka sngi sha ki nongthoh khubor, u Executive Chairman ka MBoSE u Bah EP Kharbhih u la kynnoh ba ka jinglait tuh ki jingkylli ka dei lehse namar ba don ki bor pyniaid skul kiba shet kylla bad na ka liang ka Board kan shim da ki lad ki lynti ba tyngeh ban pynshitom ia kito kiba donkti.
U la ong ba ka MBoSE kam dei ba ka pyniaid ia ka eksamin hynrei ka shu iarap ia ki skul da kaba pynkhreh ia ki jingkylli ia ki klas IX bad klas XI.
“Ngi shu iarap ia ki skul ban pynkhreh ia ki jingkylli ia ki klas IX bad klas XI. Ka daw kaba ngi shim ia kane ka lynti ka long ba bun ki skul kila leh sting kim ju pyndep ia ka course bad lada ailad ban pynkhreh hi maki ia ki jingkylli, kin leh katba ki sngew mon”, la ong u Bah Kharbhih bad bynrap ba kane ka jingleh ka dei ka jingpyrshang ka
Board ban pynbha bad pynjanai ban kyntiew ia ka pule puthi ha ka jylla.
Halor kane ka jingjia, ka MBoSE ka la dep ujor ejahar ruh lai tylli sha ki pulit nalor ka jingpynlong ia ka jingtohkit nalade.
“Ngi la ujor ejahar ha Jowai, Khliehriat bad ha Sardar Police Station halor kane ka jingjia”, la ong u Executive Chairman. Katba u Deputy Director ka MBoSE u bah M Marbaniang u la ong ba ha ka sngi Nyngkong, u la ioh iaka jingpyntip na u principal ka St Dominic Hr School u Fr Majaw halor kane ka jingjia. “Nga la leit bran bran sha katei ka skul ban kylli na u khynnah. Haba ngi kylli na u, u la iathuh ba u ioh ia ka jingkylli na ka khynnah na KJP Girls, haba ngi leit kylli na kane ka khynnah, ka iathuh ba ka ioh na u khynnah na Christian Academy bad haba ngi leit kylli na u khynnah na Christian Acdemy, u la iathuh ba u la ioh na uwei pat”, la ong u Bah Marbaniang.
U Bah Marbaniang u la ong halor kane ka jingjia, ka Board ka la ujor ejahar wut wut ha ki pulit bad kan pynshitom da kaba tyngeh ia ki briew ba donkti khlem jingmap.
“Ngi kwah ban tangon tyngeh ia kiba donkti ha kane ka kam”, la ong u Deputy Director.
Ha kawei ka liang, ki nonghikai ki la pynpaw ia ka jingsngew khia ia kane ka jinglait tuh khah khah ki jingkylli ka MBoSE bad kane ka la ktah jur ia ka burom ka ijot kaba pynlong ia ki ban duh jingshaniah ia ka Board.
“Ngi la sngew duh jingshaniah ha ka MBoSE namar ka jinglait tuh ki jingkylli kaba man ka por. Ka MBoSE ka dei ban pyrkhat biang da kumwei da kaba buh ia ka jingshaniah ha ki bor pyniaid skul”, la ong ki nonghikai skul.