NGOs Vrs MDA Goverment

Babu Kular Khongjirem

Ka khubor ban shna lynti rel ha Meghalaya ka la mih bad lynguh hi pum ha ki kot khubor man ka sngi.Ki seng bhalang(NGOs) bapher bapher ki la pyrshah beit triang ban wan ka lynti rel sha ka ri Khasi- Jaintia(namar sha Garo Hills ka la poi) namar ba ka sorkar kam pat lah satia ban pynbiang ia ki ain ki kanun ban khang lad ia ka jingrung pathar ki mynder ri sha ri jongngi.Lada ka sorkar kam pat lah ban pyntreikam ne pynurlong ia ka ILP, ki entry and exit point,etc, ka lynti rel kan kylla long pynban ka jingtim ia ka jaitbynriew rit paid jongngi namar ngi lah ban shah tyllep noh ha kine ki jaitbynriew heh paid bad ngin sa jah noh ha ki ar-lai pateng bynriew ki ban sa wan.Hooid,ka lynti rel kan long ruh ka jingkyrkhu bad ka jingmyntoi ia ka jingkiew ka roi ka par,ka khaii ka pateng hynrei lada kata ka jingroi kan pynngam bad pyntroin pynban ia ka ri bad ka jait bynriew jongngi,ki seng bhalang bapher bapher kin nym ai lad satia ia ka sorkar ba kan wan rah ia kata ka lynti rel ha ri jongngi.

Ka MDA kum ka sorkar khleh khawlang(coalition govt) ha Meghalaya ka la ktha khlieh bad king janor bha ban ai rai ia ka lynti rel ha ri jongngi.Ki paralok(political partners) jong kane ka sorkar ki la ia pyni bad ia batai ia la ki jong ki jong ki jingshem bad jingsngew jongki la kumba batai ki matlah Hindustan hyndai shaphang u hati. Ka UDP ka kwah rel tang ha Khanapara ne Byrnihat ban kit mar kit mata, ym dei shaduh Shillong.

Ka BJP pat kum ka national party, ka kwah ban wanrah syndon ia ka lynti rel haduh Shillong ban kham suk ka kit ka bah bad ka khaii ka pateng.Ka PDF pat ka la kren shai kumba ong ki seng bhalang ba ym bit da lei lei ruh em ban wanrah ia ka lynti rel ha ri jongngi la ka dei tang ka rel kit mar ha khanapara/Byrnihat kumba kwah ka UDP ne haduh Shillong kumba kwah ka BJP lymda ka sorkar kan pyntreikam shwa ia ki ain khang mynder kiba khlain kum ka ILP,entry and exit points,etc.

Ka NPP kum ka party kaba king ia ka lieng MDA kan shitom bha ban king ia ka lieng MDA.Lada kan king shakhmat ruh ym long,ban ran shadien ruh kalong kaba eh bha..Dei hangne kein ba ka NPP ka don mynta ha ka jinglong kaba ‘shong ruh jhieh,ieng ruh kynduh’. Lada jia ba kane ka sorkar MDA ka iaid shakhmat kumba kwah ka UDP,BJP, ka jingia khih ki seng bhalang ka la ap lypa ha khmat jingkhang.

Lada ka NPP kam sngap pat ia ka UDP,BJP ne PDF ka lieng MDA ka lah ban ialam pynban sha ka jing ngam noh kane ka lieng MDA. Ka jingia kawang ktieh bad ka thma ktien(war of words) hapdeng ka NPP bad ka BJP halor ka jingpyndonkam bakla ka Executive Committee ba la ialam da ka NPP ha baroh ar tylli ki District Council(GHADC bad JHADC) ruh kaba i bang bad i shyrkhei bha bad lada kim lah ban ia tem noh kloi (compromise),,ki sngi jong ka jing ngam noh ka lieng MDA ka la nang jan katba nang mih ki sngi ki bnai.