“Ngin ym shah da lei lei ruh ban pynpra ia ki dukan” longkmie Motphran

Shillong,25 Nailur:
Hadien ba la dep ban pynpra ia ka jingkieng Motphran ki bor pyniaid District bad ka tnad PWD ki la pynmih hukum ban pynpra sa ia ki ar lynnong ki dukan kiba don ha syndah bad katei ka jingkieng, kiba don sha ka liang ka diang bad sha ka mon jong ka surok bah, ba kynthup ia ki dukan sha bad ki dukan die dohsniang.
Hynrei mynta ka miet ki longkmie bad ki trai jong kitei ki dukan ki la mih puk ban pyrshah ia katei ka jingthmu ban pynpra ia ka dukan ba ki shnong, bad ia kane ki la pynpaw ha khmat ki myntri ka Hima Mylliem u myntri ka iew u myntri K.Langstieh ba u myntri pla tyngka u myntri Midnight Kharlukhi kiba la leit ban pyntip sha ki nongshong dukan ia katei ka hukum ba ki dei ban mih noh.
Haba kren ha khmat kitei ki ar ngut ki myntri ki longkmie kiba shong dukan ha kitei ki ar lynnong , ki la kyntait ban mih bad ki la ong ruh ba kin ym shah da lei lei ruh ban pynpra ia ki dukan jong ki, “Ngi la shong naduh u snem 1992 hangne lyngba ka jingaibor ka hima Mylliem, ngin ym shah da lei lei ruh ban pynpra ia ki dukan jong ngi” ong ka kong D.Majaw kawei na ki longkmie kaba shong dukan ha kitei ki lynnong jong ka Motphran.
Ka la ong ba nyngkong ki sngi haba ki wan shong ha kitei ki dukan dei ka Hima Mylliem kaba la ai bor, ia ki bad ka PWD lane ki bor pyniaid District kim dei ban tuklar eiei, ka la pynkynmaw ba shuwa ban pynpra ia ka jingkieng motphran la pyntip sha ki, ba ki dei ban lum ia ki tiar ki tar ban lait na ka jingshah ktah bad ki bud ryntih bad ki la lum ia ki tiar jong ki, “Mynta pat ki ong ban mih noh, ba kin pynpra-ngim shah da lei lei ruh namarba ka dei ka pliang ja kaba ngi im nangne” ong biang katei ka longkmie. Haba ia kren bad ki nongthohkhubor katto katne ngut ki longkmie ki la iathuh ba ha kitei ki ar lynnong ki don kumba 20 tylli ki dukan, bad ki byrngem ba lada ka sorkar ka wit ia ka dukan jong ki kaba don ha katei ka jaka, ka dei ruh ban pynpra lut shaid ia baroh ki dukan rud surok naduh Motphran shaduh them iew Mawlong.
Hadien ka jingpyneh na ki nongshong dukan, na ka liang u myntri Kharlukhi u la ong ba ka Hima ka la ioh jingtip ia kane ka hukum na ki bor pyniaid District bad ka la wan ban pyntip sha ki, hynrei haba la sngewthuh pat ba kim pdiang ia kata na ka liang ka Hima kan pyrshang ban ia kren, u myntri Langstieh pat u la ong ba hadien ba la ioh sngew ia ka rai ba ki nongshong dukan kim treh un leit rah ia ka ripod sha ki bor pyniaid District bad ban pyrshang ban ia kren lada long kaba lah. Ha katei ka jingiakren bad ki nongiew ki la don ki pulit Syiem ryngkat ki pulit sorkar ha katei ka jaka.