Ngin tam mangi na Shillong West, ong u kandidet Congress 2013

Shillong, 24 Lber:
Na ka bynta jong U bah Mohendro Rapsang, uba la ia khun pyrshah ia U bah Paul Lyngdoh, ha ka elekshon MLA 2013 bad uba la shah pynliem tang kumba 400vote, u la iathuh ha U Rupang, ba u don ka jingkut jingmut ban pynjop noh mynta ka kynta ia u kandidet jong ka seng Congress na Shillong West Constituency.
Wat la ula shah rem ialade, ha ka elekshon ba ladep, hynrei, na bynta kane ka elekshon, kaba mynta, ula ong “Ngin pynjop beit ia u kandidet lajong” bad u ong ruh ba mynta, ka jingiakhun ha Delhi, ka long kaba eh bha bad kumta, ka donkam, ban pynjop ia u kandidet jong ka seng na Shillong Constituency. “Ngin iaid beit, katba kum ka rai jong ka Seng” ong U Bah Rapsang.
Halor ka jingkylli, la U bah Paul, un jop ne em na ka Constituency, kaba ula jop kham mynshwa, ha ka elekshon MLA 2013, ka jubab na U bah Rapsang, ka long “Ngin tam mangi, ngin trei shitom bha, ba ngin tam mangi” ong U bah Rapsang. Halor ka jingkylli, la u sngew kumno, ba haba U bah Paul, uba dang shu jop elekshon MLA ha u snem 2013, ula kwah pat ban ialeh sa ia ka MP, ha u 2014, ka jubab na U bah Rapsang, ka long “Haba ka seng, ka kwah ba un ialeh, un hap ban ialeh”. Ka jubab, kaba pynkut na u myntri Rapsang, ka long ruh, ba lyngba kane ka elekshon MP 2014, ka jingpynkhreh jongki ruh, ka la iaid, ba kin rah beit ia ka thong ha u snem 2018, kaba dei kawei pat ka elekshon MLA.