Ngin sngapjar mynta shipor, ha u Nailur ne Risaw ngin sa rai la ban pynieng kyrtong ne kynshan shawei, ong ki MCPC

Nongpoh: Hynnin ka sngi Saitjain ka la don ka jingialang hapdeng ki nongialam bad ki dkhot ka Mawhati Constituency Political Committee (MCPC), ia kaba ki la pynlong ha shnong Jatah Mawhati bad lyngba katei ka jingialang, ki la shim ia ka rai ba kat haduh mynta kim pat kyrshan kyrtong ha kane ka Ilekshon 2023, hynrei ka jingkyrshan kyrtong ne ban pynieng ia u jong u kyrtong, kin sa pynbna Nailur ne Risaw mynta u snem.

Ka nongrim kaba la pynlong ia ki nongialam lem bad ki dkhot ka MCPC ba kin sngapjar shwa ia mynta shipor, ha kaba ka rai kan long beit lyngba ka Komiti jong ka MCPC, khnang ba u ne ka kyrtong kaba ieng na ka MCPC ne lada ka MCPC hi ka kyrshan, kaba mut ba kin poi beit sha ka thong jong ka jingjop.

Ka kyrwoh kaba la phah da u bah Mathias Mynsong, la pynpaw ba ha katei ka jingialang, na ka liang ka MCPC, ka la kyrpad baroh ki nongkyrshan, ki dkhot bad kumjuh ruh ia ki nongialam ha ki Circle bad Primary Unit, ba kim dei ban iakhih khohreh ban leit kyrshan ia kiwei ki kyrtong, hynrei ba kin ap shipor bad ia ka rai yn sa shim hi da ka komiti jong ka MCPC.

Ka MCPC ka la kyrpad ruh ia baroh ki nongkyrshan ka MCPC, ba lada ki lada ki kwah ban leit kyrshan sha u ne kano kano ka kyrtong, ba kim dei ban pynmih ha ka kyrteng MCPC, hynrei ki dei ban pynpaw ba ka jingleit kyrshan jong ki kan dei beit shimet, ha kaba wat ha ka MCPC ruh kam khang ia kata.