Ngin shu thap lut, na ka sorkar?

Bah RM Shabong

Ha kiba kum kine ki sngi jong ka saw ka sian, ka mih ka jingkylli, ha ka jingmut jing pyrkhat jong kiba bun bad kata ka long “Hato ngin shu thap lut, na ka sorkar?” lane “La ka sorkar, ka lah ban pynbiang lut ia ki jingdonkam jongngi?” bad halor katei ka ka phang ka jubab ka long Em.

Ngi la iohi, ha kine ki khyndiat taiew, ia ki kam radbah jong ka sorkar, ha kaba ki khubor, ki pynmih da ki dak kiba heh, ba ka sorkar India, kan thep san spah tyngka ha ka account jong ki kynthei, nangta kan ai khaw ei san kilo, nangta sa ka sorkar jylla, kaba tyrwa ban ai T.700 shi taiew bad sa kiwei de ki jing iarap; hynrei kitei kim shym la iahap satia haei haei ruh, katba kum ka jingshah set kut jong u paidbah, kaba la shibnai tam bad nangta sa ka jingrem dor ki mar ki mata kaba la palat liam.

Halor kitei ki jingshisha, ka wan ka jing kylli, la kitei ki jing iarap haneng, hato ki iahap ne em ban pynbiang ia kawei pa kawei ka iing; hynrei lada iakren ia ka jing shisha, kitei ki jingkdew haneng, kim iahap satia, wat tang ka bai tung tap ruh (khamtam ha kine ki sngi, ba rem bha ka dor ktung) bad lada ka long kumta, la ngi sngew dei ban shu ap khmih lynti, ia ka jingim jongngi, ba kan pyndap ka sorkar nadong shadong?

Ki don bun bah ki briew, kiba ju mlien ban phai khmat sha ka sorkar, ia baroh ki kam, ban phai khmat sha ki nongmihkhmat ia baroh ki kam bad kata ka long, ba nalor ba ki la ioh bam shngiam ia ka spah jong ki kandidet ha ka por elekshon, hynrei, ki iai thap ba kitei kin pyndap baroh san snem kynthih bad lada ka sorkar lane u nong mihkhmat ki leh kumta, katei ka dei ka jing ialam bakla ia ki paidbah bad lada ki paidbah ruh ki khmih lynti kumta, katei ruh kan dei ka jingleh thliem pynban ialade.

Naduh mynta ka sngi, balei ngim ia jyrwait ia la ki jong ki shkor bad ba ngin klet noh ia ka jingap thap na ka sorkar, na ki nongmih khmat ia ki jingdonkam jongngi, lane ba ngin shu shaniah beit ha ka bor jadu jong ki riew sain pyrthei baroh san snem; hynrei ba ngin ia kynmaw lane ialeh politiks noh tang ha ka por elekshon?

Balei ngim ia pyrshang naduh mynta ka sngi bad lada ngi ieng skhem ha la ki kjat, la thikna, ba ngin nym iap tyrsaw satia, namar ba U Blei na jrong, ula tip ban bsa ia u khun bynriew.