Ngin sa pynkhyllem shuki ia U Mukul, ong u Bah Paul

Shillong, 6 Naiwieng:
U Working President ka UDP u Bah Paul Lyngdoh u la ong ba ka rai jong ka UDP ban dawa hiar shuki ia u Myntri Rangbah u Mukul Sangma ka dang ieng haduh kine ki sngi.
“Ngi iai ban ba u Myntri Rangbah um dei shuh ban dang bat ia ka shuki ha kane ka jylla bad kum ka jing sngew babe ia ka jingbym lah jong u ban tehla kam ia ka suk ka sain, u dei ban hiar shuki noh”, la ong u Bah Paul.
Haba kylli hato ka party kan leh kumno ban pynhiar shuki ia u Myntri Rangbah, u Bah Paul u la ong ba ka party kan leh ia la kamram ban pynbor ba u Myntri Rangbah u dei ban hiar shuki noh.
“Ngi don ki buit hynrei ngim lah ban iathuh paidbah ia mynta” u la ong. U la ong ba ki paidbah ka jylla ki la ngiah ia ka jinglong u Myntri Rangbah ba mynta namar ba um lah ban burom ia ka sur jongki hynrei u la shu ehrang.
“Ngi sngewthikna ba ka party kan ioh ia ka jingkyrshan ha ka elekshon Lok Sabha ban wan bad ha ka elekshon District Council namar ba ki paidbah ki la ngiah ia ka polisi treikam jong ka sorkar Congress kaba pyrshah ia ki paidbah”, la ong u Bah Paul.
Kham mynshwa, ka UDP ka la wohnia ia u Myntri Rangbah u bym lah ban sngap bad ban pyntreikam ia ki mat ba ki paidbah bad ka jylla ka donkam kynthup ka jingpyntreikam ia ka Inner Line Permit (ILP), ka jingsynjor ka suk ka sain ha ka thain Garo Hills bad ki jingeh jong ki nonghikai ha ka jylla.