Ngin sa ia rai halor ka elekshon shiteng samoi ha Shella, ong u bah Hek

Shillong: U nongialam ka BJP ha Meghalaya, u bah AL Hek u la ong ba haduh mynta ka party BJP kam pat iapylleit jingmut ia ka elekshon shiteng samoi ha Shella hadien ba la khlad noh u Dr Donkupar Roy.

Haba kren myn hynnin ka sngi, u bah Hek u la ong, “Ngin sa ia rai, ngin sa iakren hadien ba la pynbna ia ka tarik elekshon”.
U la ong ba ka party kam pat don eiei ban kren, namar ba ia mynta kam pat iakren iakhana eiei halor kane ka kam.

Lah ban kdew ba ha kane ka elekshon ba la dep, ka BJP ka la sei da u bah Jropsing Nongkhlaw.
Na ka liang ka UDP, ka la dep iawer ia kiwei ki paralok kane ka MDA ba kin ai ka jingkyrshan lang ia u kyrtong ka UDP uba kan sa pynbna ha ka 22 tarik mynta u bnai. Katkum ka jingtip, la sngewthuh ba ka UDP ka lah ban sei da u khun jong u Dr Donkupar Roy ha kane ka elekshon shiteng samoi ka ban sa long shen ha kine ki bnai ban wan.
Hynrei na ki lad pathai khubor, kiwei ki paralok ka MDA kum ka PDF, ka NPP, kim pat kren shai halor kane. Ka UDP ka don bad ka HSPDP ha ka Regional Party Alliance (RDA).
Ka UDP ka don 8 ngut ki MLA mynta kynthup 2 ngut, kiba wan iasoh bad ka HSPDP ka don 2 ngut kiba iadon lang ha kane ka sorkar MDA ba ialam da ka NPP.