Ngin pyrshah lada wanrah biang ia ka CAB, ngin pynkut ruh ka jingiadei lok: James

Shillong: U Myntri ka tnad kam pohiing ka sorkar jylla u James K Sangma u la ong ba ka NPP ka ieng skhem ha ka nongrim ba ka ieng ban pyrshah ia ka CAB bad lada jia ba ka BJP kan wanrah biang ia katei ka Bill kumba la kren da u Amit Shah, u la ong ba ka NPP kan mih biang ban pyrshah.

“Ngi la kren shai ba ngi pyrshah ia katei ka Bill kaba buh jingma ia ki riewlum ka thaiñ shatei Lam mihngi, ngi la kren shai ruh ba lada mynjur ia katei ka Bill ba kan long aiñ ngin dkhat noh ka jingiadei paralok bad ka BJP bad lada nangne shakhmat kin wanrah biang ngin pyrshah bad ngin dkhat noh ka jingiadei paralok” ong u James K Sangma.

Lah ban kdew ba u President rangbah ka BJP ha ka jingkren paidbah jong u ha North Lakhimpur ha Assam ha ka 17 tarik mynta u bnai u la ong ba lada ka BJP kan wan biang ha ka bor kan wanrah biang ia ka CAB ba kan long aiñ bad ia kane u la ong ba la pynpaw ruh da u myntri rangbah duh ka Ri u Narendra Modi.