Shillong, 14 Naitiung:
Ka dorbar shnong ka Barato kaba don ha West Jaintia Hills, ka la rai ban iapyni bor beit halor ka jingkynnoh ba ka shnong Maitdein ka la wan skud jaka jubor hapoh u pud u sam jongka.
Haba kren mynta ka sngi sha ki nongthoh khubor ha Shillong, u Rangbah shnong ka Ba rato u Bah Aiborlang Sha dap, u la byrngem ba ka shnong kan rah sha ka iing kashari pyrshah ia u Rangbah shnong ka Mait dein ban dawa bai myn rainkhmat uba kynnoh khlem nongrim ba ki dkhot ka dorbar shnong Barato ki la hiar thma ia u da ki tiar pynmynsaw.
La iathuh ba ka jingiaknieh jaka hapdeng kine ki ar shnong ka don hapoh ka iing kashari district council court.
U Bah Shadap u la iathuh ba ka mukotduma halor ka jingiaknieh jaka la ujor sha ka kashari district council court ha u bnai Jymmang.
U la kam ba ka shnong Maitdein kam shym la lah ban sei ia ki sakhi satar halor ka jing knieh jaka jongka, kaba dei jong ka bor shnong Barato.
U la ong ba katkum ka jingiateh, la ailad ia ka shnong Maitdein da ka jingkubur jong u Doloi ka Shilliangmyntang u Sa muel Bareh ha u snem 1951 ba kin shu rep shu riang ia ki briew kiba dei na ki shnong ba hap ha ka Elakas ka Shangpung bad Raliang ia ka jaka ba don ha Maitdein. “Ia kane ka jingiateh la pynthymmai ha u snem 1991 da u Doloi Khamly Sariang ha kaba la ailad ba kin bteng ia ka jingrep jingriang jongki tangba kim lah ban kam trai ia ki jaka.
Kine ki ar tylli ki shnong kim dei kiba heh ha kaba ka Maitdein ka don tang 300 iing katba ka Barato ka don kumba 700 iing.
U BahShadap u la iathuh ba ka jingiakajia knieh jaka ka la mih hadien ba u Doloi Khamly Sariang u la iasoi ia ka jingiateh thymmai bad ka shnong Maitdein khlem ka jingmynjur ka dorbar shnong Barato.
Kane ka la mih madan hadien ba u Doloi Sariang ha ka shithi ba la thoh sha u Chief Forest Officer ka Jaintia Hills Autonomous District Council (JHADC) ha ka 30 tarik Nailur, 2013 kaba u la thoh ba dei ban weng noh ia ka jingrejister ia ka jaka khlaw ha Maitdein namar ba u la bakla.
Hadien kane, ka dorbar shnong Barato ka la pynlong ia ka jingjurip ia ka jaka ia u pud u sam ha ka 27 tarik Iaiong 2015. “Hynrei na ka liang u Rangbah Shnong ka Maitdein u la kynnoh pynban ba ki briew ka Barato ki la wan knieh ia ki jaka rep ki pung dohkha jong ki briew”, la ong u Bah Shadap.
Halor kane ka la mih ka jingpynbam ktien hapdeng kine ki ar shnong bad ha ka 1 tarik Jymmang, u Deputy commissioner u la khot hajir ia kine ki ar tylli ki bor shnong bad ha kane ka jingkhot, u DC u la bthah ia ki ban leit sha shnong ban iakren pynbeit bha halor kane ka kynrum kynram bad kine ki ar shnong ki la pynlong ia ka jingiashong pynbeit ha ka 11 tarik Jymmang ba la don lang ki pulit.
“Ha kane ka jingialang, ka shnong Barato ka la tyrwa ban iapynbeit ba ka shnong Maitdein ka dei ban aiti noh ia ki syrnod jaka hynrei na ka liang u rangbah shnong ka Maitdein, u Bah Arphi Sariang u la pan por ban iakren ia kane ka kam bad yn iakren biang ia kane ka kam ha ka 16 tarik Jymmang hynrei khlem urlong haduh mynta”, la kam u Bah Shadap.
Ha ka 25 tarik Jymmang, u DC u la khot biang ia ka jingialang ha kaba u la hukum ba ka shnong Maitdein ki dei ban sangeh ban leh ia ki kam ha kitei ki jaka haduh ban da pynbeit da kumwei pat.
U CEM ka JHADC u la khot hajir ia ki ha ka 24 tarik Jymmang ban iakren pynbeit ia kane ka kam ha kaba u la ong ba ka Barato ka dei hok ia kitei ki jaka katkum ki dulir pynban ha katei ka jingialang u Doloi u la len ba soi ia ka jingiateh ha ka 9 tarik Nailar, 1990, la ong u Bah Shadap.
Kane ka kam ka don ha jingiakhun ha iing kashari district council court bad dang shen ka la pynmih ia ka hukum ba ki briew ka shnong Maitdein ki dei ban kiar na kaba leit leh ia ki kam ki jingtrei ha ki jaka ba iakajia.
Ka shnong Barato ka la byrthen ban ujor bai mynrainkhmat pyrshah ia u rangbah shnong ka Maitdein halor ka jingkynnoh jong u, ba ki briew jong ka shnong Barato ki la hiar thma ia u ha 6 tarik Naitung.
Ka shnong Barato ka la byrngem ba u Rangbah Shnong ka Maitdein u Bah Bah Arphi Sariang u dei ban sei ia ki jingshisha halor ka jingkynnoh jongu bad lada um lah, kin kiew beit sha iing kashari ban dawa pynshitom ia u katkum ka ain.
Phi don ban ong eiei?