Ngin pyndam ia ka jingmynjur ia ka GSI lada ka dei ban tih Uranium: Teinwel

Shillong: U Chief Executive Member (CEM) ka Khasi Hills Autonomous District Council (KHADC), u bah Teinwel Dkhar u la kular hapoh ka iing dorbar ba ka Executve Committee (EC) kan sa pyndam noh shi syndon ia ka No Objection Certificate (NOC) ba la ai da ka EC barim sha ka Geological Survey of India (GSI) ban surbe ia ki marpoh khyndew ha ka thain South West Khasi Hills, lada ka dei ban tih ia u uranium.
Haba pynshai halor ka mat ba la wanrah da u MDC na Nongpoh u bah R Rani, u bah Teinwel u la ong ba kane ka mat ka dei kaba khia bha namar ba ka dei kaba la pyrshah da ki paidbah baroh. Hynrei u la ong ba katkum ba paw ha ki lad pathai khubor, u director ka GSI u la kam ba ka jingsurbe kam dei satia ban tih uranium hynrei ka dei ia kiwei ki marpoh khyndew kum ia u bauxite.
“Ngin khot markhmat ba kin pynshai bad lada ym sngew hun, ngin weng noh shi syndon ia ka NOC ba la ai da u CEM barim u bah HS Shylla”, la ong u bah Teinwel.
Shwa ia kane, na ka liang u Executive member ba peit ia kane ka kam, u bah Mitchell Wankhar u la ong ba ia kane ka kam la leh da u Executive Committee kaba rim ba ialam da u bah HS Shylla. U la ong ba katkum ka jingtip ka jingsurbe kam dei ia u uranium hynrei na ka Council kan sa bishar bniah ia kane.