Ngin nym pdiang ia ka jingkren u Myntri, namar ka lynti rel kadei kamad jong ka jaitbynriew: HYC

Shillong 26 Rymphang: U president ba rangbah jong ka seng Hynniewtrep Youth Council (HYC) u bah Roykupar Synrem u la ong, ba ka jingkren jong u Myntri ka sorkar Jylla u bah Kyrmen Shylla, ba ki briew ba nabar kim lah ban wan tuklar ne muslia ia ka kam wanrah lynti rel bad ka shong ha karai ki nongshong shnong ka Jaintia Hills.

Kane ka jingkren jong u bah Kyrmen Shylla u Myntri ka sorkar, ka la pynlong ia ka seng ban mih shakhmat ban pynpaw, ia ka jingbym lah ban pdiang ia ka jingkren utei u Myntri.

Ha ka jingiakren bad ki lad pathai khubor ha ka nohphai sngi ka 26 Tarik Rymphang 2025, u bah Roykupar u la ong ba karai ban mynjur ia ka lynti rel kadei ka rai jong ka jaitbynriew ym tang ka rai jong ka Jaintia Hills.

U la ong, ba ka jingwan rung kyrthlep ki mynder shapoh ka Jylla ym tang hapoh ka Jaintia Hills, hynrei kan ktah ia ka jaitbynriew hi baroh kawei.

Nalor kata u ong, ba U Myntri um dei ban pynmih kum kita ki kyntien namar haba shim ia kano kano karai kadei ban don ia ka jingia sngewthuhlang na baroh ka jaitbynriew.

Ka kam lynti rel kadei ka kadaw bah ka ba ngin hap ban iakren bha, bad ym ba ngi pyrshah ia ka jingwanrah ia ka lynti rel hynrei ngi pyrshah ia ka jingbym  don ki ain ki ba biang ki ba lah ban tehlakam ia ka jingwanrung kyrthlep ki briew ba nabar,la ong u bah Roykupar.

U la ong, ba  ” Ban rai kat ia kata kakam ban wanrah lynti rel ka ba ngi sngewthuh ka ba lah ban ktah bad buh jingeh ia ka jaitbynriew,ngi sngewban ong ba kan dei ka rai jong ka jaitbynriew hi baroh kawei “.

U bah Roykupar Synrem u la ong ruh, ba Ka seng ka krenshai ba kan nym pdiang ia ka lynti rel la ha kano kano kadur, lymda ka sorkar India bad ka sorkar Jylla kin wanrah ia kita ki aiñ ban iada iangi kum ka jaitbynriew rit paid.

Katkum ka Jingsngew thuh Jong ngi ,ba lada wan kane ka  lynti rel, ka lah ban wanrah jingeh ia ngi kum ka jaitbynriew rit paid. Kumta ka seng ka kren da kaba shai ba kan nym pdiang ia ka jingwan ka lynti rel katbym pat biang ia ki ain ki balah ban tehlakam ia ka jingwan rung kyrthlep ki mynder.