Ngin nym iateh lok bad kiwei ki seng trai ri:Bindo

Shillong, 08 K’lyngkot:
Ka UDP ka la iaid shaid shaid mynta ban pynkhreh ia ka elekshon MDC shiteng samoi bad ka la dep pynap lypa ia ki briew ban iakhun ha man ki konstitwensi.
U Working President ka UDP u Bah Bindo M Lanong u la ong ba la pynkhreh shaid shaid ia ka kam namar ba ym pat tip lypa lano kan wan.
“Ngi la pynkhreh hi ia ka elekshon namar ngim tip lypa lano kan wan ka elekshon”, la ong u Bah Bindo.
U la ong ba ha ka jingsngew jongu, ka elekshon kam dei ban pynlong slem than haduh u Iaiong ne Jymmang hynrei la kumno kumno dei ban pynlong noh ha u Rymphang ne Lber namar ba lada slem than, kam da don jingmut shuh.
Halor ka jingkylli la ka UDP kan iateh lok ne em bad kiwei ki seng riewlum ha kane ka elekshon shiteng samoi, u Bah Bindo u la ong ba na ka bynta ka elekshon shiteng samoi MDC, “ngim nym iateh paralok bad kino kino ki seng riewlum ha kane ka elekshon shiteng samoi”.
Ka elekshon MDC shiteng samoi kan sa long ha ki 7 tylli ki konstitwensi hadien ba la iehnoh da ki 7 ngut ki MDC kynthup 6 ngut ha KHADC bad kawei ha JHADC.
Ki jaka ba lait thylli ki MDC ki long ka Laban ba iehnoh u Bah Sanbor Shullai (NCP), Sohiong jongu Bah HDR Lyngdoh (Congress), Mairang Bah Metbah Lyngdoh (UDP), Mawthadraishan Bah H Brolding Nongsiej (UDP), Nongkrem Bah Ardent M Basaiawmoit (HSPDP), bad na Rambrai-Jyrngam bah K Plasting Pangiang (HSPDP) na KHADC bad u Bah Stephanson Mukhim (Ind) na Amlarem ka JHADC.