Shillong 25 Rymphang: Ha ka step jong ka sngi nyngkong, kata ka 24 tarik Rymphang 2025, ki paidbah na kylleng ki konstitwensi ha la kijong kijong ki jingkyrshan, ki la wan poi ha ISBT, Mawiong ban sngap ia ka khubor jong ka ilekshon MDC sha Khasi Hilla Autonomous District Council (KHADC).
La sakhi ba ki paidbah naduh kapor 7 baje mynstep ki la wan pyndap ia ka surok ha ISBT, Mawiong bad ban ieng lain ter, ban sngap ia ka khubor khylli vote mynta ka sngi, ha kaba bun ki nongkyrshan ba wan dei ki nongkyrshan jong ka party VPP.
Ka jingishngain ka sngi khylli vote mynta ka sngi, ha kaba ki nongkyrshan ha la kijong kijong ki party, ki la wan ban rah ryngkat ki lama jongki ban don ka jingkyrmen ba ki kyrtong ba ki kyrshan kin jop donburom.
Haba pyrshang ban iakren bad ki paidbah ki ba dei ki nongkyrshan jong ka seng VPP shwa ban pynbna ia ka Result ki la ong, ba ki kyrtong ba la pynieng da ka party VPP, ba maki ki kyrshan radbah kinjop kput beit ha kane ka ilekshon MDC namar ba ki kwah ia ka jingkylla ha ka synshar ka khadar.
Ki la ong, ba ngin nym bein ka kiwei pat ki party bad khamtam ia ka NPP ka ba lamkhmat ia ka sorkar jylla, ki la ieh khunswet bad bym peit ia ka khia ka shon u paidbah ka jylla bad khamtam ba kadei ka party ka ba la bamsap, ha kaba u duk u suk ki iap. Kumta ha kane ka kynti ba mynta ngin ai ka jingkyrshan ba radbah ia ka VPP ba kan synshar.
Watla ka party VPP kadei ka party ka bym don pisa ban iakhun ia kane ka ilekshon, hynrei ka jingieit bad shaniah u paidbah, ban thep pynjop beit naduh ka mynsiem, ki la ong.
Shuh shuh ki la ong, ba ha kane ka ilekshon ba mynta ngim shem la biej shuh ia ka pisa ba shah pynbiej, hynrei naduh mynta bad haduh ki snem ban dangwan baroh ngin kyrshan beit ia ka party VPP.
Kumjuh ruh ki ong, ba mynta ki paidbah ki la ai shisha ka jingkyrshan ha kane ka ilekshon MDC ha ka ilekshon MLA ban dangwan ruh, ngin kyrshan tyngeh ka ka VPP ba kan jop bad ban ioh synshar syndon ia ka jylla.
Kum ban shu kdew hangne, ba hadien ba ladep ban pynbna lut ha baroh ki konstitwensi ki ba na East Khasi Hills District, ka seng VPP ka lajop haduh 17 tylli ki seat bad ka la lah ruh ban thaw ia ka Executive Committee (EC) hapoh ka District Council.
Phi don ban ong eiei?