Shillong: Ka Hynniewtrep Achik National Movement (HANM) ka la byrthen ba kan pynlong ia ka jingkhynra naphang ia ki nongdie madan naduh Motphran, Bimola, Khyndai Lad ter ter, namar ba kam lah shuh ban shu peit ia ka jingkharoi ki nongdie madan khamtam ki bar jylla bym ithuh ithaw shuh haduh ba ka la wanrah ka jingwit ia ki nongiaid nongieng bad ka jingkhim ka lynti.
Myn hynnin ka sngi, ka HANM hapoh ka jingialam u president u bah Lamphrang Kharbani ka la iakynduh ia u myntri pynroi sor u bah Hamletson Dohling ban ai por shi bnai ban leh eiei ia kane bad lada kim leh, ka seng kan sa khynra hi naphang.
“Ka sorkar ka dei ban kyndang noh ia ki khar die madan, die juti, die shana, die jain naduh Motphran shaduh Khyndai Lad namar ba ka la pynwit ia ki paidbah bad teng teng long kumba iabok khlem da iakut ban iabok la shu iatyngkhuh na ka jingtur ki nongdie madan ha ki lynti syngkieng”, la ong u bah Lamphrang.
U la ong ba ka seng kam dei ba bishni ia ki hynrei ka la pynwit shaba palat bad ka dei ban buh noh ia ki nongdie shawei pat ban lait na ka jingwit u paidbah.
Ki nongdie madan ki dei kiba nabar jylla suda kiba la shu wan buhai shane bad kine ki la wan ha ka kyrteng die jingdie hynrei ki leh ia ki kam beain.
U la ong ba ka jingmih ki kynthei Khasi ban kam ia ki dukan haba khynra dukan ka district council, ka la long kumba pynshlur ia ki bar jylla ban wan leh trai da ki bar jylla sha kane ka ri ban shu leh kam khaii katba mon.
Phi don ban ong eiei?