Ngin jop, U Chairman u la don lypa bad ngi:Latiplang

Shillong: U nongialam ka kynhun thymmai ka United Democratic Forum (UDF) jong ki MDC ka Congress, katto katne na NPP, PDF bad MDC shimet, u bah Latiplang Kharkongor u la kam ba ka kynhun jongu kan jop ha ka jingiatynjuh bor mynta ka sngi namar ba ka jingdon ki MDC ka la biang bad kim shym la kylla satia.

 Hynrei ha kajuh ka por, ka Congress kaba don bun tam ki MDC haduh 9 ngut, ka la kyntait ban shimti ban iakhun ia ka shuki CEM watla ka la don ki briew kiba biang.

   Haba kren hadien ba la dep thep kyrteng mynta, u bah Latiplang Kharkongor u la ong ba, “Kumba phi iohi ha ka iing dorbar ka Executive Committee ka la khyllem”.

 U la bynrap, “Phi la iohi u chairman u la don lypa bad ngi, ka jingjop kan dei beit ka jong ngi, baroh ki MDC ki iatylli baroh”.
 U la iathuh ba u la thep kyrteng ban iakhun ia kane ka kam CEM hadien ba la kyrshan ki MDC ka Congress, katto katne na ka NPP bad PDF nalor ka MDC shimet kiba la jied ia u kum u nongialam ka Parliamentary Party ka United Democratic Forum (UDF) ha ka jingialang hynnin ka sngi.
   U bah Latiplang u dei u MDC la saw sien na Nongthymmai uba la jop ha kane ka sien kum u MDC shimet.
    Na ka liang u nongialam ka Congress uba dei ruh u secretary ka Parliamentary party ka UDF u bah Charles Marngar u la kam ba ka rai ban bynshet ia ka shuki nongialam ha u bah latiplang u MDC shimet ka dei ka rai kaba iamynjur lang watla ka Congress ka don 9 ngut ki MDC hynrei kam treh ban shimti ban iakhun ia kane ka shuki.
     U la ong ba kam dei ba ka party kam don briew ban shimti ia kane ka kam hynrei ka dei namar ba ka jingialang ka la iahap bad mynjur ia u bah Latiplang.
   Ha kajuh ka por, u Secretary ka UDF u bah Charles Marngar u la kyntait ba ka Congress kam don briew haduh ban ai ia ka kam nongialam ha u MDC shimet hynrei u la kam ba ka dei ka jingiasngewthuh jingmut jong baroh ki MDC ba la shim ha ka jingialang ka kynhun UDF.
    “Ngi la pynbeit lang, ngi iohi u bah Latiplang u don shibun ki jingshemphang, ngi don ka jingshaniah kum uwei na ki MDC ba la kham rim tam”, la ong u bah Charles.