Shillong,12 Naitung:
Ka la don ju don ka kyntien kaba ong ba haba la bun than ki nong shet ka pynsniew pynban ia ki jingbam, ka la long ruh halor ka ishu Uranium ha kaba la iohi ba bun tylli ki seng ki la pyrshah ia ka ingtih Uranium. Lah ban kdew ba ka KSUka dei ka seng kaba nyngkong eh kaba la shim ia katei ka ishu hynrei mynta la iohi ba la mih bun tylli ki seng kiba la shimlang ia katei ka ishu pyrshah Uranium.
U Rupang, u la ioh ban ia kren bad u General Secretary ka KSU halor katei ka phang, u samla Auguster Jyrwa u la ong ba ka KSU kan ym ia khleh jaktung bad kiwei pat ki seng ban ia khih pyrshah Uranium hynrei kan iaid beit la ka jong ka lynti, “Naduh ba sdang ngi la shim ia katei ka ishu haduh mynta, hynrei kham hadien ka LYWA ka la wan ia soh lang halor ka nongrim ba ngi ieng, ngin iaid beit shakhmat la ka jong ka lynti kumba ngi la ieng naduh ba sdang” ong u samla Auguster Jyrwa haba ia kren bad u Rupang.
U samla Jyrwa u la ong ba ka KSU ba ka tip shai naduh u snem 2014 ba ka surok ban wanrah kam pynroi pynroi hapoh ka thaiñ Wahkaji kam dei kaei kaei ruh hynrei ka dei beit ka jingthmu ban tih Uranium, “Ngi la pyrshah jur naduh katei ka por, ngi la leit ialap kylleng katei ka thaiñ ban pynsngewthuh ia ki paidbah, hynrei ki la kynnoh ba ka KSU ka pynwit ia ka roi ka par katei ka thaiñ hynrei ynda ki la wad jingtip hadien ki sa tip ba ka dei shisha ka surok Tih Uranium” u la ong da kaba bynrap ba ka jingmih tender ha kine ki sngi kaalpynpaw tyngkreiñ ba ka dei ka jingtih Uranium.
Halor ka jingmih kiwei pat ki seng u samla Jyrwa u la ong ba um tip kaei ka nongrim ba ki ieng hynrei kumba la iohi ha ki kot khubor i kumba ki don ki seng kiba kwah surok hynrei kim kwah pat ban tih Uranium bad u la ong ba um tip kaei ka nongrim jong ki, hynrei u la ong ba ka nongrim jong ka KSU hi ka dei ban pyrshah ia ka jingtih Uranium, “Ngi la kren shai ba ngi pyrshah ia ka jingtih Uranium,ngin ym ailad da lei lei ruh” u la ong.
Shuh shuh u samla Jyrwa u la ong ba um kwah ban ong eiei ia ka nongrim ba kiwei pat ki seng namarba wat ki ishu ba ka KSU ka shim ruh kam pat lah ban pynurlong lut ia ki, halor ka jingshim kiwei pat ki seng ia ki ishu kiba ka KSU ka la shim u la ong “Ngi kmen eh lada kiwei ki seng ki lah ban leh na ka bynta ka ishu ka jaitbynriew,ngim don eiei ban ong ia kata, hynrei ki dei ban don ka nongrim kaba skhem” u la ong.
Dang shen ka la mih ka huri hura halor katei ka ishu Uranium ha kaba ka la don ka jingiasiat maw,ka jingiasiat marble haba la kylli na u samla Auguster shaei katei ka jingmut jong ka huri hura ka thew, u la jubab ba um don jingtip shaei katei ka kam shano ka thew jngai hynrei u la ong ba baroh ka shong ha ka sorkar, “Ngim lah ban ong eiei ia ka jingmih ka huri hura, ngim tip hi ruh naei ka huri hura ka mih,hynrei ngi shu kwah ban ong ba baroh ka shong hi ha ka sorkar,aiu kan leh” pynkut utei u nongialam ka KSU.
Phi don ban ong eiei?