Ngin duwai ia U Blei bad ngin long ka ‘Atiar’ ka Jingsuk

Jowai, 21 Jymmang:
U Bishop ka Jowai Diocese, u Rev. Fr. Victor Lyngdoh u la kyntu ia ki paid khristan ba kin duwai ha U Blei ba ngin long ki atiar jong ka jingsuk.
Haba kren ha ka mass ba kyrpang mynta ka sngi ha Syiem Jingsuk Parish, Amlarem na ka bynta ban pynkyntang ia u Dikon Marcellinus Riawed War kum u Lyngdoh ba thymmai ka Balang Catholic, u la ong ba ka lyngkor jong u Lyngdoh ka dei ka lyngkor u Nongaplangbrot uba bha (U Jisu) ban pynim ym ia lade, hynrei ia ki briew.
“U Lyngdoh u ban shim ia ka bynta jong u Khrist u hap ban buh ia la ka jinglong jingim ha u Jisu”, la ong u Bishop Victor Lyngdoh.
Ia u Dikon Marcellinus Riawed War la pynkyntang Lyngdoh hapdeng ka jingsakhi ki phew hajar ki paid riewngeit ka Balang Catholic na ki parish bapher bapher jong ka Jowai Diocese bad ki lyngdoh bapher kiba trei hapoh ka Jowai Diocese bad na kiwei kiwei ki Diocese jong ka jylla bad nabar ka jylla.
U Phadar Marcellinus Riawed War u dei na ka Shnong Nongtalang bad u dei u khunswet napdeng ki saw ngut shi para. La kha ia u ha ka shnong Kharkhna West Jaintia Hills ha ka iing Khristan Presbyterian hynrei ki la pyniasoh noh sha ka Balang Catholic ha u snem ba la kha ia u. Udei u khun ba lai jong I kong Unifirlda War (bam Kwai ha iing u Blei) bad I bah Riang Pohlong. Ha u snem 1990, ki kmie ki kpa jong u ki la kynriah noh sha ka Shnong Nongtalang bad u Phadar Marcellinus u wan na ka iing kaba duk bad kaba riewblei. U Phadar Marcellinus Riawed War u dei u Phadar Khasi-Pnar uba hynniew ban shah pynkyntang Lyngdoh hapoh ka kynhun MSFS ka Balang Catholic. U la smai ban long brother ha u snem 2009 bad la pynkyntang Dikon ia u ha ka 6tarik Jylliew 2016. U la pyndep ia ka BA bad Philosophy na Suvidya College Bangalore bad ia ka Theology na Oriens Theological College, Shillong.