Shillong:Ka Mawlai Barber Association (MBA) ka la buh ïa ka thong ban seng noh la ka jong ka jaka ai jinghikai khapshñiuh ne ka Training Centre na ka bynta ki samla Khasi kiba don jingthrang, jingangnud bad kumjuh kiba don ka sap ban khapshñiuh.
Katei ka jingthmu ban ai jinghikai ka long na ka bynta ki samla Khasi kiba sah ha Mawlai bad kumjuh ruh sha kiwei pat ki jaka khapsor bad ban ïasnohkti lang ruh bad kiwei ki seng khapshñiuh, lada ki don ha kiwei kiwei pat ki jaka.
Ïa katei ka jingthmu la pynpaw da u President ka seng u Bah Daniel Ramsiej haba kren ha ka sngi Saitjaiñ ha shwa ba ka seng Meghalaya Indigenous People’s Front (MIPF) Shillong city ka la aiti ïa ki marbam sha ka seng MBA ban aiti sha ki para dkhot kiba don ym duna ïa ka 30 ngut tam eiei.
“Naduh u snem 2004 ngi la don kumba 30% ki dkhot bad mynta haduh une u snem ngi la don kumba 90 haduh 95% bad ka jingthmu ka long ban knieh ïa ka kam ki nongwei da kaba jar jar, namar kumba long ha ki por mynshwa kidei beit tang ki bar jylla kiba trei ïa kane ka kam khapshñiuh,” ong u Bah Ramsiej.
U la ong ba ïa mynta hapoh Mawlai la bun ki Khasi ki samla kiba trei ha ki kam khapshñiuh bad kane ka jingthmu ban buh ka jaka ai jinghikai ka long ban knieh noh da kaba jar jar ïa ka kam kaba ju trei da ki nongwei bad kumjuh ruh ban plie kam ïa ki samla Khasi kum ha kane ka por ba dang kynrei bha ka jingpang khlam Coronavirus ne Covid 19 kiba bun ki samla kiba buh dukan khapshñiuh bad kiba bylla ki la shu shong ïing.
” Ngi don ka jingthmu ban ïatreilang bad kiwei ki seng ne Association khnang ban myntoi ka jaitbynriew jong ngi,” ong u Bah Ramsiej.
Haba ai jingkhublei ïa ka seng MIPF Shillong city kaba la nohsynniang da ki marbam mardih kiba bun jait kum ha kane ka por ba jur bha ka jingkyrduh ka ïoh ka kot, u la bynrap ruh ba ki dkhot ka seng mynta ki hap mad sa ka jingeh ha kaba ïadei bad ka bai wai dukan kaba poi kumba T. 1500 haduh T. 5000 shi bnai bad ka bai bording ba pyndonkam ka long ym duna ïa ka T. 1500 eiei.
“Ki don ki samla Khasi kiba ngi ai jinghikai bad ngi ai ruh ïa ki syrnot ne certificate khnang ba ynda ki la ïoh syrnot ki lah ban shim ram, ban ïoh ki subsidy, ki skhim bapher bapher kiba la ai da ka Sorkar,” ong u Bah Ramsiej.
U la ïathuh ruh ba kumba long haduh ka sngi Saitjaiñ ka seng ka la ïoh jingïarap marbam, dei tang na u MLA ka Mawlai Konstitwensi bad na ka seng MIPF.
Ha shwa ban aiti ïa ki marbam mardih na ka liang u President ka MIPF Shillong city u Bah Pynshngaiñ Diamai u la ong ba ka seng watla ka dang long kaba dang shu seng dang shen, hynrei da ka jingsynniang ki para dkhot la ïoh ban kynshew bad ban thied ïa ki marbam ban synniang ïa ki longïing kiba tlot ka ïoh ka kot, kumjuh ruh da kaba sngewthuh ïa ka jingeh ki dkhot ka MBA.
Ha katei ka sngi la sakhi lang da ki dkhot ka seng MIPF Shillong city kynthup ruh u General Secretary ka MIPF Central body u Bah Donboklang Khongsit bad ki dkhot ka MBA.
Phi don ban ong eiei?