Ngim shngain, lada hiar ki sengbhalang, ong kiba sah khappud

Nongpoh:Ki la don ki riew paidbah kiba sah ha ki thain Umlaper, Raid Nongtung bad kaba la ju tip paidbah kum ka Block-2, kiba la pynpaw sha u Nongthoh khubor, da kaba ong ba lada hiar palat ki seng da ki spah spah ngut ha ki por ba don ki huri hura, ka pynjynjar kylla ia ki paid Khasi, kiba sah ha ki shnong khappud.

Ki don kiba la pynpaw, ba ki kmen eh haba ki nongialam bad ki dkhot na ki kynhun seng bapher bapher, ki hiar ban leit jurip ia la ki para doh para snam, hynrei ka jingleit jurip jong ki kam dei ban leit ha ryngkat da ki spah spah ngut ne khlem da kynjoh ktien ia ki nongialam shnong jong katei ka thain, namar lada ka jingleit jurip kaba leit ha ryngkat ki spah spah ngut, ka pynartatien ia kiwei pat ki jaidbynriew kiba iasahlang ha ki khappud, namar ka thain khappud hi ka dei ka jaka kaba sah da ki jaidbynriew bapher bapher. Hadien kata bad u soh jong ka jinghiar kynhun jong ki, ka long ba yn jynjar kylla ki Khasi kiba sah ha ka thain.

Khlem da kren jrong ne bunktien ne ban kynthoh iano iano ruh, kitei kiba la pyntip sha u nongthohkhubor, ki la pynpaw tang kumta hi, hynrei ki bynrap ia ka kyntien, da kaba ong ba ki paid Khasi kiba sah ha ki shnong kiba don ha katei ka thain, ki kwah ban don ka shongsuk shongsain bad ban lait na kino kino ki huri hura bad kiba ktah ia ka shongsuk shongsain.

Iano yn bein, iano yn kynnoh bad mano ki ban sngewthuh halor ka jingeh kaba la kynduh da ki paidbah kiba sah ha khappud, khamtam eh ha kito ki shnong kiba la kam ba ki hap hapoh ka Raid Nongtung bad kaba la tip paidbah kum ka Block-II, ha kaba la iohi ba kitei ki shnong kata naduh Khlieh Umwang sha Madan Umwang, Sabuda, Jatalong ter ter shaduh Umlaper bad sha Ummat, la iohi bad lap ba ia ki surok kiba kongsan tam na ka bynta ka leit ka wan ki paidbah ha kitei ki shnong, la shna pynbha lut da ka sorkar Assam.

Kan long ruh ka jingshisha, ba ki heh na Meghglaya la ka long ki Nongmihkhmat ne nongialam seng, haba ki thmu ban leit sha kitei ki shnong khappud khamtam sha Block-2, kin ym poi da lei lei, lada kim iaid ne pyndonkam ia ki surok babha kaba la wanrah da ka Assam bad kaba la pynmyntoi ia ki paidbah Khasi kiba sah ha khappud, hynrei ki heh na Meghalaya kim ju lah ban leh ei ei ha ki kam ba shisha, na ka bynta ban theh buk buk ia ki kam pynroi sha kito ki shnong khappud bad ka Assam.