Ngim pat sangeh ia ka jingdawa ILP, ong u President KSU

Shillong, 3 Rymphang:
“Ngim pat ieh lane ngim pat sangeh ia ka jingdawa ia ka Inner Line Permit (ILP)” ong u samla Daniel Khyriem President KSU haba ia kren bad ki nongthohkhubor mynta ka sngi. Katei ka jingkren u samla Daniel ka dei halor ka mat lynti Rel kaba la don ki kynhun sengbhalang kiba la ong ba ka jaka rung jaka mih, kan ym lah ban teh lakam ia ka jingrung kyrthep ki mynder lait noh na ka ILP.
“Ha ka jingiakren bad ka sorkar , ka la ong ba kan ym lah ban pyntreikam ia ka ILP, ka la pan jingmut na ngi da kaba kum kano ka aiñ ban pyntreikam, ngi la ong ba donkam ia ka aiñ kaba ia syriem thik kum ka ILP, ka KSU kam pat sangeh ia ka jingdawa ILP, ngi la ong ba lada dep ban pyntreikam ia ka Entry Exit Point ruh ngi hap ban peit bniah la ki lah ne-em ban treikam kumba la thmu ne ioh ka don jingduna pynban” ong u samla Daniel.
Katei ka jingkren u samla Daniel ka dei halor ka lynti rel kaba ka KSU ka la ong ba ka dang ieng pyrshah haduh mynta ruh la ka dei ka rel kit briew ne ka rel kit mar katba ka sorkar kam pat lah ban wanrah ia ki aiñ kiba khlaiñ ban iada na ka jingrung kyrthep ki mynder.