Ngim pat iahap ia ka rukom ot doh sniang ka Amerika

Shillong, 19 Naiwieng:
U President ka seng ki nongdie doh sniang u Bah Donlang Kharumnuid u la ong ba ka jingrukom ot doh sniang ki nong-Amerika kam pat iahap ban pyndonkam ha kane ka ri namar ba ki briew kim pat lah kot bor ban thied.
Haba iakren hynnin ka sngi, u bah Donlang uba leit iashim bynta ha ka jinghikai ot doh sniang ki briew na Amerika bad Germany ha ka jing pynlong ia ka tamasa bam tynrai dang shen, u la ong, “Ka rukom ot doh sniang ki nong-Amerika ka kham pher bha ha kaba ki ot ia u sniang kumba ot masi bad hadien ki la khoh snieh kumba khoh snieh masi bad ki shim tang ki doh met”.U la iathuh biang, “Ka rukom ot doh sniang ki nong-Amerika ka long ba ki shim tang ia ki doh met kumba ot slai bad bun ka doh ba la bret noh. Ka dor ruh shi kilo ka long ym duna ia ka T. 1000 (shi hajar tyngka). Shane sha ri jong ngi ban die doh T. 1000 shi kilo ym don nongthied bad ka jingleh jong ki nong-Amerika kam pat iahap tar satia ban pyndonkam ha kane ka ri jong ngi namar ba ngim don ki tiar kiba biang bad ki briew ruh kim pat riew spah”,.
U la iathuh ruh ba ki nong-Germany pat ki ot sniang da kaba shu tied tlok na shalangmat u sniang bad u la iap. Ka rukom ot sniang ki nong-Germany ka pher na ki nong-Amerika, u la ong. “Ki nong-Germany ki puid sniang syriem kumba leh ma ngi ki Khasi ha kaba ki said da ka um ia ki sniang kumba pynkhuid syiar”, la ong u Bah Donlang.U la iathuh ba kine ki nongot doh na Amerika bad Germany ki la iaroh ia ka rukom ot doh ki Khasi namar ka ibang ka doh.