Ngim lah ban shakri ar kynrad ha kajuh ka por, ong U Ma Lahkmen Rymbui

Shillong: Hadien ba ka jingpynbna ka la mih ban khang ia ki nonghikai ban iashim bynta ha ka kam saiñ pyrthei, na ka liang u Myntri ba khmih ia ka tnad pule puthi ha ka jylla, u Bah Lahkmen Rymbui u la ong ba ka jingthmu jong ka sorkar ka long beit kaba shai, ba ka saiñ pyrthei kam dei kaba lah ban trei tang shiteng sngi ne tang shiphang bad ka kam hikai ruh kam dei ka kam shiteng sngi, hynrei baroh artylli ki kam ki don la ka jong ka kamram bad ka jingkitkhlieh bad u la ong ba ka Sorkar Jylla ha ka 5 tarik u bnai Lber 2021 ka la pynkylla biang ia ka Service Rule jong ki nonghikai ha ki skul ba ioh bhah ban pyniaid katkum ki kyndon na ka sorkar. U Bah Lahkmen u la ong ba ki School Managing Committee ruh ki pynpaw ba ka kam hikai ka don la ka jong ka kamram ba dei ban kitkhlieh.

U Bah Lahkmen Rymbui u la kren shai ba ka kam seng saiñ pyrthei bad ka kam hikai kam dei shuh ka kam shiteng sngi ne ka kam kaba shiphang hynrei ki dei ki kam kiba hap ban trei dep ne pura. Shuh shuh u Bah Lahkmen Rymbui u la ong ba ka Sorkar kam khang iano iano ki nonghikai ban iakhun bad ieng ia ka elekshon, hynrei lada ki kwah ki hap ban jied tang kawei ka kam la ki kwah ban hikai ne ban ngam sha ka jylli jong ka kam saiñ pyrthei bad u la pynpaw ba ma u ruh u la shakri kum u ophisar sorkar haduh 19 snem, hynrei u la iehnoh na ka kam jong u, namar ba u kwah ban trei noh ha ka saiñ pyrthei. Shuh shuh u la ong ba da lei lei yn nym lah ban shakri ar kynrad ha kajuh ka por, hynrei ka dei ka por ba dei ban shakri tang ia kawei ka kam, ym ban shakri katba don.