Ngim kyrshan satia, dei ka jing iakhih kaba khlem nongrim, ong ki trok kit maw na Pynursla

Shillong:Wat la ka don ka jingkhang kali jong ki nongniah kali kamai, ha ka lama jong ka Meghalaya Joint Action Committee of Commercial Vehicles (MJACCV), hynrei ki lad khubor, ki iathuh ba ki trok kit maw, kiba na ka thain Pynursla, ki iaid beit shakhmat myn hynnin ka sngi, ban kit maw na ki par maw bad ban leit pynhap ruh sha Bangladesh.

U nongthoh khubor, u iohi, ia bun bah ki trok, kiba kiew ba hiar sha katei ka thain, ba kynthup ia kiba iaid suda lem bad kiba kit mar ruh kumjuh.
La iohsngew ruh ha ki tynghung, ia ka jing pyrta, ha kaba la bthah ia ki trok kit maw, ba kin iaid beit ia la ka lynti naduh na ki par maw shaduh sha Bangladesh bad la iathuh ba ki volunteer, ki la don ban pahara ha ki jaka bapher, ban khanglad ia kano kano ka jing pynthut.

Haba iakren bad U bah R Lyngdoh, uba dei U Adviser jong ka Riwar Mihngi Exporter and Importer Association bad uba dei ruh u nongkren jong ka Covid Team jong katei ka seng bad nangta jong ka Riwar Mihngi Truck Owners and Drivers Association, u iathuh ba kitei ki ar seng, kim don bynta satia bad katei ka jing iakhih jong ka MJACCV bad la iathuh ba mynta ka sngi, ki don 300 tylli ki truck kiba hiar sha Bangladesh bad lashai ka sngi, ruh kin iaid beit kumba ju long hi. U bah Lyngdoh, u ong “Ngim kyrshan satia, namar ba ka dei ka jing iakhih, ka bym don nongrim” bad ula ong shuh shuh ba ki nongkhaii ruh ki ju mad ia shibun ki jingeh, ha kaba kiew ka khajna, ka royalty, hynrei kim ju pyndik satia ia ki paidbah. U bah Lyngdoh, ula ong ruh ba ki seng nongkhaii lem bad ki nong pyniaid trok sha thain Riwar, ki kwah ruh ban iarap ia ka sorkar, ba kan kham ioh kamai bad ba kan ieng ha la ki jong ki kjat. La ong shuh utei u rangbah, kumba imat, kane ka jing iakhih, ka don ruh ka jingleh politics, ha kaba lada khot iakren ka DC ruh ki nong pyniaid kali, kim treh leit shim bynta satia. La ong shuh, utei u rangbah, ba ha u snem 2015, haba ka kashari, ka khang ban tih maw, hynrei, kitei kim shym iakhih paidbah satia bad ki iaid beit da u khulom ban weng halor katei ka jingshah khanglad jongki.