Shillong, 07 Naitung:
U Myntri Rangbah ka jylla u Dr Mukul Sangma u la ong ba ka sorkar jylla kam don jingtip eiei ia ka jing pynmih jingpynbna ka kompeni tih uranium ka sorkar India ka Uranium Corporation of India (UCIL) ha kane ka jylla.
Haba kyntait ba ka sorkar jylla kam don jingtip eiei ia kane, u Myntri Rangbah u la ong, “Lada ka sorkar India ka tih uranium, kan hap kitkhlieh hi. Ngim bna eie ngim ioh jingtip eiei ba kan tih uranium ha ka jylla”.
Kane ka jingkren jong u Myntri Rangbah ka long hadien ba ki lad pathai khubor ki la buh jingkylli ia ka jingpynmih pynbna ka UCIL kaba ka khot tender ha kawei ka kot khubor ha kane ka jylla ban shna ia ki jingdonkam ha ka jaka tih uranium kaba don ha Mawthabah-Domiasiat ka South West Khasi Hills.
“La iathuh ia nga ia kane, hynrei kam don satia kano kano ka khubor na ka sorkar India kaba ai dak ia ka jingtih ia u uranium. Lada ki tih kin sngewthuh bad kin kitkhlieh hi lada mih ka kynrum kynram ha ka liang ka shong suk shong sain”, la ong u Myntri Rangbah.
U la ong ba ka tnad ban peit ia ka shong suk shong sain ka hap ha ka kti jong ka sorkar jylla bad lada don kano ka jingmih ka kynrum kynram ka sorkar jylla kan sa peit.
Lah ban kdew ba ki sengbhalang bapher ka jylla ki la pyrshah jur ia ka jingkhot tender ka UCIL ban shna ia ki jingdonkam ha ka ktem u uranium bad ki la byrthen ba kin sa pynlong ia ka jingpyrshah da ka jingiakhih ba tyngeh lada ka sorkar bad ka UCIl kim sangeh noh ia ka jingthmu ban tih uranium namar ba ki sngew ba ka jaitbynriew kan don hapdeng ka jingma jong ka jingiap them lada tih ia u uranium.
Ki sengbhalang ki la pyrshah ruh iaka jingthmu ban shna surok Two Lane na Nongstoin sha Mawthabah namar ba ki sheptieng ba kane ka surok kam dei na ka bynta ban wanrah ia ka roi ka par hynrei ban pynsuk ban kit ia u uranium na katei ka jaka.
Kham mynshw, wat u CEM ka KHADC u Bah Pynshngain N Syiem u la ong ba ka Council kan nym ai NOC da lei lei ruh na ka bynta ban tih uranium.
Phi don ban ong eiei?