Ngim ju khleh um, ha ka petrol, hynrei dei ka sorkar India, kaba khleh ia ka ethanol, ong ka PDAM

Shillong: Hadien ka jingmih ka khubor pyrshah ia ki katto katne tylli ki petrol pump, ba don ka jingkhleh um ha ka petrol na ka liang ka Petroleum Dealer Association Meghalaya, mynta ka sngi ka la mih shakhmat ban kyntait ia kane ka jingkynnoh bad pynshai ba dei na ka daw ba ka sorkar india, ka la khleh da ka ethanol ha ka petrol. Haba ia kren bad ki lad pathai khubor na ka liang, u bah Kenedy C Khyriem u President ka Assiociation, u la iathuh ba ka jinglap ia ka um ha ka petrol, ka dei, tang namar ba ha ka petrol ka don ka ethanol kaba la khleh 10%.

“Ha u bnai Rymphang mynta u snem, ka sorkar India ka la sdang ban khleh 10% ia ka ethanol ha ka petrol,bad dei na kane ka daw ba don ka um ha ka umphniang petrol” u la ong.

U la bynrap ruh “Lada kawei ka kali kit petrol kan kit 12,000 litter ka petrol,12,00 litter kan dei ka ethanol bad ka ethanol kan don 5.5 % ka um, namar ba ka ethanol ka tan ia ka um na ki haw haw bad ka petrol Pump kaba kit 10 kali ha ka shibnai kumba 60% ka um kan don ha kane ka jaka pynlang umphniang petrol”. U bah Kenedy u la pynshai ruh “Halor ka jingkhleh ia ka ethanol ha ka petrol, na ka liang ki assiociation na kylleng ka Ri, hi ki la pyrshang ban pyrshah, hynrei namar ba ka pyrthei baroh kawei ki la pyndonkam kumta ha ka ri ruh ki la bud lang ia kane”. U bah Kenedy u la pynshai ka daw ba na ka liang ka sorkar ka la rai ban pyndonkam ia ka ethanol ha ka umphniang ka long ba ka ethanol, ka pynduna ia ka jingpynmih ia ka tdem na ki kali.

Kawei ka long ruh, namar ba ka dor ka long tang T.65 tyngka shi litter, katba ka umphniang ka long T. 95 shi liter bad lada kawei ka pump ka die T.1lak shibnai ka mut T.30 lak bad ha ka ri India baroh kawei da ki klur kan ioh nong ka sorkar India.

Ban shna ia ka ethanol donkam da ki jingthung bad kane kan iarap ia ki nongrep pai, riewhadem bad kiwei kiwei kin ioh jingmyntoi. “Hynrei ka jingeh hangne pat ka long namar ba kane ka ethanol ka don ka um bad lada khleh lang bad ka um kaba don ha jaka pynlang petrol bad ka um na ki kali, ka ioh khleh lang kane ka lah ban mih ka jingeh ka ba bun”u la bynrap. Na ka liang u ne u president ka Association u la buh ka jingkylli ba mano ki trai petrol pump ki ban khleh um ha ka umphniang, namar ia lade ruh ki pyndonkam ia kine ki petrol. “Da ka jingmih kine ki khubor bun na ki petrol pump ki la shah ktah, hynrei kane ka dei tang ka jingkynnoh ba ki petrol pump ki khleh um ha ka jingshisha, ka dei tang namar ba don ka 10 % ka ethanol bad namar ba ka jylla ka dei kaba jur u slap ka lah ban don ka jingrung ka um sha ki jaka pynlang umphniang” u la bynrap.