Ngim ithuh ia ka Seng Khasi Hima Mawsynram bad ngim tuklar halor ha ka MBOSE: JAC Seng Khasi

Shillong, 08 Naitung:
Ki jingkam jong ka Seng Khasi Hima Mawsynram ba ka long trai ia ka krem Maw jymbuin, Mawsynram bad ka jingdawa jong ka ban weng noh ia ki katto katne ki lynnong kot na ka kot ‘Dienjat Ki Longshwa’, la shim ba ki long kiei kiei kiba khlem nongrim da ka Joint Action Committee (JAC) kaba kynthup da ki hynriew tylli ki kynhun Seng Khasi kiba hap hapoh ka Hima Maw synram.
U Bah D.K. Wah lang, Chairman ka JAC u kyntait ban don jingtip halor katei ka Seng Khasi Hima Mawsynram bad u ong, “Ngim don jingithuh ia ka ta ka Seng Khasi Hima Mawsynram bad nangne sha khmat ngi na ka liang ka JAC jong ki kynhun Seng Khasi kiba hap hapoh u pud u sam ka Hima Mawsynram ngi kyntait ia ka jingkam ka Seng Khasi Hima Mawsynram.”
Kane ka JAC jong kitei ki kynhun Seng Khasi k kynthup ia hynriew tylli ki kynun Seng Khasi na ki shnong bapher bapher jong ka Hima Mawsynram ba kynthup ia ka Seng Khasi Nongrum Mawsynram, Seng Khasi Khliehshnong Mawsynram, Seng Khasi Lawbah, Seng Khasi Mawkaphan, Seng Khasi Kenbah Syntein bad ka Seng Khasi Jympiat.
“Ka Seng Khasi Mawsynram Circle la pynlong khnang ban pynshai ia ki paidbah ba ngim don ia ka jingiadei bad ka Seng Khasi Hima Mawsynram bad ngim tip eiei ruh ban tuklar ia ka jingtreikam jong ka ,” la ong u Bah Wahlang u ba la kdew ruh ba dei ka Seng Khasi Hima Mawsynram kaba la phah dorkhas sha u Myntri Rangbah ka Ri u Narendra Modi, ha ka jingwan jngoh jng u ia ka nongbah Shillong.
U Bah Wahlang u la ong ruh ba ka Seng Khasi Hima Mawsynram, kumba la paw ha ki kot khubor ba la ialm khmat da u Bah Tyllilang Myrthong kum u President bad u Bah Batista Myrthong kum u Secretary, ka la kam trai ia ka jaka ba don ka Krem Mawjymbuin bad dawa ban weng noh ia ki lynnong ba 4, 12, 14, 17, 21, 24, 25, 49, 50, 51, 52 bad 53 na ka kot ‘Dienjat Ki Longshwa’ da kaba kdew ruh ba kitei ki lynnong kot ki wanrah ia ka jingsngew bad jingpyrkhat niam Khristan.
“Ka JAC jong ka Seng Khasi kan nym tuklar eiei ha kaba ia dei bad ka Education Department ha ka jingpynrung ia kino kino kikot pule ha ka syllabus. Ka Seng Khasi ka dei kaba seng kaba pynnneh pynsah ia la ki jong ki riti ki dustur bad ka niam ka rukom, hynrei kim don bynta ei ei bad kata ka Seng Khasi Hima Mawsynram”, la ong shuh shuh u Bah Wahlang .