Shillong: Halor ka jingkynnoh u myntri ka tnad pynroi sor u bah Ronnie V Lyngdoh ba ka sorkar ka la aiti sha ka District Council ban shna ia ki aiñ shna ïng, u bah Pynshngaiñ N Syiem CEM ka KHADC u la ong ba ha ka jingiakren bad ka sorkar ha ka 14 tarik u nohprah, 2017 la ong ba ka sorkar ka dei ban pynkylla ia ka Building Bye Laws katkum ka jingkwah jong ka District Council bad ki Rangbah Shnong. Hynrei u la ong ba ka sorkar kam pat shym la pynkylla bad ka kwah pynban ba ka District Council kan pyntreikam noh.
U Bah PN Syiem, ha ryngkat ki nongialam jong ka PDF, haba pyllait paitbah ia ki mat ilekshon jong katei ka Seng.
“Lada ki pynkylla ia ka Building Bye Laws katkum ka jingkwah jong ka District Council ngin thaw ia ka building Bye Laws Committee, hynrei kim pat pynkylla ki nangmut ngi dei ki Dalal jong ka aiñ MUDA, ngim dei ki Dalal, ngim lah ban pdiang” ong u bah Pynshngaiñ N Syiem ha ka jingialang jong ka PDF haba ialap elekshon ia u kyrtong katei ka seng na Mylliem u bah Hamlet Dohling.
Haba kren ha katei ka jingialang kaba la long ha Umlyngka u bah Pynshngaiñ u la ong ba ka District Council kan dang hap ban peit bniah shuwa ia kita ki aiñ shna ing haduh ba ka sorkar kan da pynkylla kumba kwah ka District Council. Ha katei ka jingialap elekshon u bah Pynshngaiñ u la ther tyngeh ia ka seng Congress kaba ialam ia ka sorkar halor kiba bun ki mat kynthup ka jingshah sloit bor ki Rangbah Shnong. Lah ban kdew ba khyndiat sngi mynshuwa u bah Ronnie u la takraiñ ia u bah Pynshngaiñ da kaba kynnoh ba ka sorkar ka la dep ban aiti ha ka District Council ban thaw aiñ shna ing hynrei um shym la pynmih satia tang ka jingpynbna ruh.
Nalor u bah Pynshngaiñ bad u bah Hamlet kiwei pat kiba la don ha katei ka jingialang ki kynthup ia u Bah Ivanlumlang Marbaniang – President PDF, u Bah G Laloo uba dei u Secretary ka Synjuk ki Rangbah Shnong Upper Shillong, u Rangbah Shnong ka Umlyngka u Bah Stephen Lyngdoh, ki nongkitkam ka PDF Zonal Committee Mylliem Constituency lem bad kiwei kiwei.