Ngiah ka Saitsohpen ia ki nongmihkhmat, kwah ban khih noh da ka shnong

Shillong, 10 Nailar:
Ha ka jingialang paidbah kaba la long mynhynnin ka sngi ha Saitsohpen, Sohra kaba dei ka ijngialang ban pyrshah ia ka jingklun jaka jubor ka sorkar ha Saitsohpen, ym shym la iohi ba kin don lang ki nongmihkhmat paidbah bad ym shym la iohi ruh ba kin don bynta lang ki sengbhalang lait noh ki Seng Samla napoh katei hi ka Elaka. Wat la ki la don ki ophisar bad u nong-iasaid aiñ uba la wan mih khmat ia ka District Council ha katei ka jingialang ym shym la iohi ba u MDC ka Sohra u bah Donevan Kharwanlang lane u MLA jong ki, u bah Donkupar Roy ba kin ia don ryngkat bad ki paidbah.
Haba la kylli na ki nongsynshar katei ka Elaka balei ba ki nongmihkhmat jong ki lane ki sengbhalang kim ia wan ban pynshngaiñ lang ha katei ka jingiakhih, u sordar ka Saitsohpen u bah T.R Malngiang u la ong ba kim shym la pyntip ia ki nongmihkhmat bad kim shym la pyntip ruh sha ki sengbhalang naba ha kane ka kynti ba mynta u la ong ba ki kwah ban ia khih radbah hi noh tang da ka bor shnong.
U bah Malngiang u la iathuh ba lah da ki phew snem ba la ia khih ia katei ka kam ryngkat bad ki nongmihkhmat hynrei kam poi shaei shaei ruh naba la shu pynkhih tang shipor ar por bad hadien la kynjah noh. U la pynkynmaw ia ki por ba la ia khih ia katei ka kam naduh ka por u bah S.P Swer bad u Dr.F.A Khonglam ( bam kwai ha dwar u blei) hynrei kaba sngewsih u la ong ba u nongmihkhmat ba mynta lei u Dr.Donkupar Roy u la pynduh jingkyrmen pynban ia ki. “Na kata ka daw ngim kwah ban don bynta bad ki nongmihkhmat lane ki sengbhalang, ngin iaid beit tang da ka bor shnong” u la ong.
Lah ban kdew ba bun ki nongmihkhmat ka thaiñ Sohra ki dei ki nongshong shnong hapoh ka Elaka Saitsohpen bad ki don ka ing ka sem hapoh ki jaka katei ka Elaka kaba kynthup naduh u MLA ka Shella u Dr.Donkupar Roy, u MDC ka Sohra u bah Donevan Kharwanlang, u MLA ka Sohra u bah Titos Chyne bad katto katne ngut ki kyrtong ia khun elekshon na ki ar tylli ki konstitwensi ki don ka ing ka sem hapoh ki jaka katei ka Elaka kaba ka Elaka ka shim ia ki kum ki nongshong shnong.