Ngi sngewlem ia u Bah Pynshngain, ong ka BJP

Shillong, 17 Risaw:
Ka BJP Meghalaya ka la tynruh dieng tyllaw ia ka Congress da kaba kynnoh ba ka jingpynshitom ban sospen ia u Bah Pynshngain N Syiem, ka pyni ba u nongialam ka MPCC u Bah DD Lapang bad u Myntri Rangbah u Dr Mukul Sangma ka party Congress ki la phiel.
Haba kren mynta ka sngi sha ki lad pathai khubor, u President ka BJP u Bah Shibun Lyngdoh u la ong ba ka jingphet seng ki san ngut ki MDC ka Congress bad ka jingsospen ia u Bah Pynshngain N Syiem na ka party ka la pynpaw shai ia kane ka jingbym ler ka Congress.
“U President ka MPCC bad u Dr Mukul Sangma ki la phiel. Ngi sngewlem ia u Bah Pynshngain halor kane”, la ong u Bah Shibun. U la ong ba watla ka jingjia ia u bah Pynshngain ka dei ka kam iing ka party Congress hynrei ka party ka sngew lem namar ba u Bah Pynshngain u la iakhun ia ki kyndon jong ka riti synshar ka ri katkum ka bynta jong ki district council.
“Ngi sngewlem ia u Bah Pynshngain uba iakhun ia ka ki kyndon ka riti synshar ka ri na ka bynta ka Council”, la ong u Bah Shibun.
U la ong ba ka party BJP kam don eiei ban khot ne ban wer hynrei lada u wan ban pyniasoh bad ka party, ka kloi ban pdiang. “Lada u wan kynthup u Bah AL Hek sha ka party, ngi kloi ban pdiang ia ki”, la ong u Bah Shibun. Ha kajuh ka por, u la ong ba u Bah AL Hek ruh uba dei u BJP barim hynrei ba pyniasoh bad ka Congress, lada un wan, ka party ka lah ban iapyrkhat ban pdiang biang ia u.
Katba u General Secretary ka BJP u Bah David Kharsati u la ong ba ka jingkynnoh ba ka BJP ka dei ka party shit niam ka long ka jingialam bakla ia ki paidbah. “Ki kyrtong jong ngi ki dei ki Khristan suda, ka jingkynnoh shit niam ia ka BJP ka dei tang ka jingthmu ban ialam bakla ia u padbah”, u la ong. U la ong ba mynshwa ruh, ki MLA BJP ki dei ki Khristan suda bad haei kata ka jingong ba ka BJP ka dei ka seng shit niam.