“Ngi ruh te kiba matlah?”

AIS Suja

“Ngi ruh te ngi long kiba matlah?” Kane ka dei ka jingkylli jong ki pharisi para maki hi. Kane ka jingkylli ka mih hadien ba u Jisu u la pynpeit ia ki khmat jong uba matlah ha ka sngi Sabbaton jong ki Jiw ha Israel hyndai.

Ki Jiw ki niewkor eh ia ka sngi Sabbaton haduh mynta naba ki ngeit ha ki hukum u Moses bad ki burom ia ki ain u Moses bad ki ong – “Ngi ngi long ki synran u Moses” Ioanis 9:28.

U Jisu u long u ksiang ka jutang bathymmai. Hebru 9:15. U Jisu u la pyndam noh ia kaba Nyngkong ba un ioh pynneh ia kaba Ar. Te lada kata ka hukum ne ka ain ba nyngkong ka biang yn ym da la pynneh ia kata kaba Nyngkong.
Hynrei namar ba kam biang, u Jisu kum u trai ka Sabbaton, u la pynkhein ia kane ka ain Sabbaton kaba ki Jiw ki niewkor haduh mynta bad ki mane ha kane ka sngi kein namar la thoh ha ka jutang barim, ba ym bit ban leh ei ei ha kane ka sngi Sabbaton. “Rakhe khuid ia ka” Exodus 20:8.
Haba u Jisu u la wan, u la pynkhein ia ki ain ka Sabbaton, te ki Jiw ki la kem daw ia u Jisu namar u la pynkhiah ha ka Sabbaton. Kumta kita kiba na ki Pharisi ki la ia ong – “Une u briew (u Jisu) um long na u Blei, namar um sumar ia ka sngi Sabbaton. Ioanis 9:16. U Jisu u ong – “La thaw ia ka Sabbaton na ka bynta u briew, ym u briew na ka bynta ka Sabbaton. The Sabbath was made for man, not man for Sabbath. So the son of man is Lord even of the Sabbath” Markos 2:27-28. Kumta u khun u briew (U Jisu) u dei u trai ka Sabbaton.
Ki Jiw ki sngewphylla bad artatien namar kim ngeit ba u Jisu uta uba pynkhiah ha ka sngi Sabbaton u dei uba la phah da u Blei na bneng uba la wan ha ka jinglong doh (Born in flesh) namar ki ong ba bun ki tip bad ithuh ia u. Ki ong – “Ia une ngi ia ithuh nangno u long!” Ioanis 7:27.
Ki Jiw ki ong ba ki ithuh bha ia u Jisu, hynrei kim ngeit kim pdiang ia u. Na kata ka daw ki ong – “Kumno u briew uba pop u lah ban leh ia ki kambah kat kine?” Bad ki ia kylli ruh ha uta u matlah ba dei uei uba la pynpeit ia ki khmat jong u? U matlah u jubab u ong – u dei u Nongiathuhlypa u Prophet. Don pat napdeng ki Jiw kim ngeit ba uta uba matlah ba u dei uba matlah! Ki Jiw ki kylli ia ki kmie ki kpa jong u hei bah hei kong, une u dei u khun jong phi ia uba phi la kha matlah? Te kumno mynta u la iohi mat? Oh! une u dei u khun jong ngi uba ngi la kha matlah hynrei u la iohi mat mynta bad ngim tip mano ba la pynpeit ia ki khmat jong u. Ki kmie ki kpa jong u ki ong – u lah khynraw te phin ia kylli hi noh na u! ka daw ka long namar ba ki kmie ki kpa ki sheptieng ia ki Jiw, namar lada phla ba u long u Khrist uba la pynkhiah ia u, yn kyntait noh ia u khun jong ki napoh Synagog” Ioanis 9:19-22.
Kita ki Jiw ki la ong ha uta uba matlah lada kumta te ‘to ai burom ha u Blei, namar uta u briew (Jisu) u long uba pop. Uta ba matlah u la ong – hynrei tang kawei nga tip ba nga uba la juh matlah baroh shikatta, mynta nga iohi ki khmat! Ioanis 9:24-25.
Nangta ki lorni pat ia uta uba matlah ki ong “Kaei u la leh ia me?” “kumno u pynpeit ia ki khmat jong me?” u matlah u ong – Nga la dep iathuh naduh mynne ia phi hynrei phim sngap. Te ki la ia kren bein ia u ki ong – “Oh me long u synran jong u? ngi te ki synran u Moses. “Ngi tip ba u Blei u kren ha u Moses, hynrei une te tip nangno u long?!. Uba matlah u ong – wow kaba sngewphylla shisha, haba u la pynpeit ia ki khmat jong nga hynrei phim tip pat nangno u long?! U matlah u ong ha kita ki Jiw – “U Blei um sngew ia kiba pop hynrei tang ia kita kiba leh ia ka mon jong u. Naduh hyndai haduh mynta ym don uba lah ban pynpeit ia ki khmat uba matlah lymda u la long na u Blei”.
Ki Jiw ki la sngew bitar ia uta uba matlah bad ki ong – “La kha ia me ha ki pop suda te me hikai mame ia ngi? Ki la shop ia u shabar” Ioanis 9:26-34.
U Jisu te u la kylli ia uta uba matlah “Me ngeit ha u khun u Blei? U matlah u la kylli – U long uei te kynrad ba ngan ioh ngeit ha u?! u Jisu u la ong – “Me la iohi ia u, bad uta uba kren bad me, long ma u” u matlah u ong – “Nga ngeit ko Trai, bad u la mane dem ia u Jisu, bad u Jisu u la ong ha u – “Dei ia ka jingbishar kein ba nga la wan sha kane ka pyrthei; ba kita ki bym iohi, kin iohi: bad kita kiba iohi kin long noh kiba matlah” Ioanis 9:35-39.
Ki Pharisi ki la iohsngew ia kane ka jingiakren bad ki la kylli ia u Jisu ki ong – “Ngi ruh te ngi long kiba matlah?”u Jisu u jubab ia ki – “Lada phi la long kiba matlah, phim don pop. Hynrei mynta phi ong – “Ngi iohi”. Kumta kata ka pop jong phi ka sah kein ha phi” Ioanis 9:40-41.
U Jisu u la pynpeit ia kiba matlah hynrei bun kiba peit ki khmat, ki long pynban kiba matlah haduh kine ki sngi na ka daw ka jingbymngeit bad bymkohnguh. Kumta ka pop jong ki ka sah ha ki.
Bun bah ki ong “Ngi ngeit” hynrei ki iaid ha ka jingmatlah wat haba ki peit, bad kita kiba matah ki ialam ia kiba matlah, baroh ar ki ia hap ha ka thliew, namar ki hikai ki jinghikai briew bad da ki rukom pateng la pateng. Mathaios 15:3-6.
Na kata ka daw to ngin kylli halade katba ka dang shah ka por- “Ngi ruh te ngi long kiba matlah?” Ioanis 9:40-41.