“Ngi lah ban nym die waidong shuh” u tympew T. 12 spah & kwai T. 2600

Shillong:Kiba bun na kiba die kwai dong ha ki jaka bapher bapher ki la pynpaw ïa ka jingbynñiaw hadien ba ha kine ki sngi bad bnai ki la shem ïa ka jingkiew dor palat liam jong u tympew bad u kwai tylli.

Haba ïakren bad u nongthoh khubor kiba bun na kitei kiba die kwai dong ki bym kwah ïathuh kyrteng, ki la ong ba lada ka dor jong kitei ki marrep ki iai bteng ban kiew kin hap ban sangeh noh ka die ‘waidong’ namar kim lah shuh ban pynmih, mynshwa ki shait ai haduh 5 kyntien ha ka dor T. 10 hynrei mynta wat 4 kyntien ruh kim lah shuh ban pynmih.

“Haduh mynta ka sngi ka dor jong u tympew ka la poi haduh T. 300 shibiah bad shitap ka la poi T. 1200 kumta ka la ktah shibun ïa ka jingdie ‘waidong’ jong ngi bad lada ïai long kumne ngin hap sangeh noh ka die kwai dong bad ka dor u kwai ka la poi haduh T. 2400 haduh T. 2600 shi kani bad uba duna dor ruh la poi T. 1800 shi kani kaba mut kumba 400 tylli bad lada phiah ruh un mih tang 3 haduh 5 kyntien kumta ka la eh bha ïa ngi ban pynmih dor trai,” ong katto katne ki nongdie waidong haba kren bad u nongthoh khubor.
Ha kawei ka liang pat, haba ïakren bad ki nongkhaïi kwai-tympew ki la ïathuh ba ka jingrem dor u tympew kan iai bteng haduh u bnai Jymmang namar mynta ba lah jan duh artat u ‘la ïaw’ bad bym pat ïoh ‘la’ lung bad kumjuh ruh namar ka jingduna ka jingpoi u tympew bad u kwai na thaiñ War kumta kiew dor kine ki marrep.

“Kumba long mynta u marrep na thaiñ War um poi thikna shuh sha Shillong bun ki la leit khaiï hi sha Synteng, Pynursla, bad don ruh kiba wan thied na Bangladesh bad kiwei ki jaka bad jylla namar ki nongkhaïi ki ïoh pisa beit ha jaka die kumta bun ym poi hok shuh sha Shillong,” ïathuh katto katne ki nongkhaïi ha u nongthoh khubor.
Ki la ïathuh ruh ba mynta u ‘la’ ïaw’ u lah lut artat bad u ‘la lung’ pat um pat mih. “Naduh une u Ïaiong haduh u Jymmang kadei ka por bad aïom barem dor tam u tympew bad na thaiñ Bhoi ruh ym poi mar shuh mynta ba bun la leit sha Assam bad namar ki nongrep kim ïoh mar, kin hap die rem bad kumjuh ruh bym poi shuh ki marrep sha Ïewduh kumta kan sa rem ka dor tympew bad kwai,” ki la bynrap.
Ki la ïathuh ruh ba mynshwa u kwai bad tympew na ki thaiñ Syntung, Mawlat, Nohron, bad kiwei ki jaka ki wan die beit sha Shillong, hynrei mynta kam long shuh kumta.

“Ka jingkiew dor u tympew ka don da ka por bad aïom hynrei u kwai pat u rem dor naduh basdang haduh mynta ym pat hiar dor bad kaba pher ka long ba mynta u snem rem dor lang baroh ar ki marrep,” ki la ïathuh da kaba bynrap ba mynta u kwai u wan poi na Tura, Ratacherra, Silchar bad na Dawki pat u poi khyndiat bad u kwai na thaiñ Bhoi un dang poi ha ki bnai ba 6 bad 7 ne bnai Jylliew bad Naitung bad u kwai u rem bha tang mynta u snem.