Ngi la thmu ban beh seng ia u Bah Latiplang: KHNAM

Shillong, 12 Nailar:
Ar sngi hadien ba u MDC ka Nongthymmai u Bah Latiplang Kharko ngor u la iehnoh na ka KHNAM, u nongialam ka party u Bah James Ban Basaiawmoit u la ong ba ka party ka la dep thmu ban beh noh ia u Bah Kharkongor na ka  party, kham mynshwa namar ba u kham ieid ia ka HSPDP ban ia ka KHNAM.
”Ngi la plan bad iakren hapoh ka party ban beh noh ia u. Ngi la thmu ban pan jingshai noh shwa ban shim ia ka rai”, la ong u Bah Basaiawmoit ha ki nongthoh khubor ha kane ka sngi Balang.
Ka jingmih hi jongu ka bha pynban shwa ba ka party kan beh seng namar ba kan long kum ka jingniew bein. U la ong ba ka seng, kam sngew tynnad ia u MDC ka Nongthymmai hadien ba u la pep ia ka jingialang kumba 15 sien.
Hynrei kaba sngew lyngngoh ka long ba u MDC ka Nongthymmai um ju pep ban leit sha ka jingialang ka HSPDP. ”Man ka por ba ngi khot sha ka jingialang u la shu ai daw kumne kumtai. Kane ka pyni ba um don mynsiem shuh ha ka party bad kham ieid ia ka HSPDP”, la ong u Bah Basiawmoit.
U Bah Basaiawmoit  u la ong ba ka jingleh jong u Bah Kharkongor ban leit jingialang sha kiwei kiba la khot da kiwei ki party khlem pyntip sha ka party ka long ka jingialeh pyrshah ia ka party.
”U Bah Kharkongor u la leit ban don ha ka jingialang ba khot da u Bah Ardent Miller Basaiawmoit ha madan Student’s Field ban dawa pynkylla nongialam ka UDP ha ka ARPA khlem ka jingtip ka party. Kane ka dei ka jingsdang kaba u Bah Kharkongor u sdang ban leh jngai ia ka KHNAM”, u la ong u Bah Basaiawmoit. Um ju wan jingialang shisien ruh ha ka jingialang ka ARPA ha iing u Dr Donkupar Roy ban iapynbeit ia ki kynrum kynram ha ka ARPA ha kito ki por. ”Ngim ju khmih lynti ba un leh kumta kum u MDC ba la kham iaw ba la shah jied lai sien na Nongthymmai”, la ong shuh shuh u Bah Basaiawmoit. U Bah Kharkongor u la jop na ka KHNAM ha u snem 2005 bad 2009 sha ka KHADC.
“U la mih ha u snem 2012 ban iasoh bad ka UDP lem bad nga. Bad ngi la ia wan biang sha ka KHNAM ban iakhun ha ka MDC elekshon ha u snem 2014 bad ngi la jop.  Mynta u la phet biang na ka Party. Ngam sngew thikna haei un ieng mynta”, la ong u Bah Basaiawmoit. Kumjuh u general secretary ka KHNAM u Bah Batkupar Wahlang u la ong ba u Bah Kharkongor u kham ieid ia ka HSPDP ban ia ka KHNAM kumba u la pyni.