“Ngi la bunkam palat ngim don por shuh ban ia syllok bad U Blei”

Jowai, 5 Lber:
‘Kane ka por kaba ngi im kadei ka por kaba ngi bun kam eh, ngim don por shuh ban kynmaw ia U Blei bad ruh ban ia syllok bad U Blei’ la ong u Pastor FS Rymbai haba kren ha ka jingiaseng Samla KJP Synod Mihngi kaba 15 kaba la long mynta ka sngi ha Balang Presbyterian, Mihmyntdu.
“Ko ki samla, ki longkmie longkpa, ngi donkam ban ia syllok bad U Blei khnang ba ynda ngi la mih shabar na la iing jong ngi, ngin ym shah jop satia ha ki jingsniew jong kane ka pyrthei”, la ong u Pastor.
Da ki phew hajar ki riewngeit ka KJP Synod Mihngi na kylleng ki Balang ha rilum Khasi bad Jaintia kynthup ruh kiba na Assam, ki la wan tuid sha katei ka jingiaseng samla ka KJP Synod Mihngi kaba la sdang naduh ka 3 tarik bad kut noh mynta ka meit sngi U Blei.
Nalor ki phew hajar, la wan sakhi ruh ia kane ka jingiaseng bah ki Samla KJP Synod Mihngi da ki nongmihkhmat kiba kynthup ia ar ngut ki MP, u ma Vincent H Pala bad u Conrad Sangma nalor u CEM ka JHADC u Ma Thombor Shiwatu MLA ka Sutnga, u ma Hopeful Bamon, u Dy. CEM ka JHADC u ma A Andrew Shullai, u ma Moonlight Pariat u pa Dolloi Jowai, u Puramon Kynjing.
U Rev. FS Rymbai uba la sam ia ka khubor kaba u la pynshong nongrim na ka Kitab ki Nongbishar 16:28 u la ong, U Blei u kwah ban thaw thymmai ia ngi, u kwah ban pyllait ia ngi na ka jingshahteh mraw ka jong ngi ha ki jingsniew jong ka pyrthei.
Katba ha ka jingiaseng nohphai sngi, u Rev. K Pariat u la sam ia ka khubor ba bha ia kaba u la pynshong nongri na ka Gospel u Ioanis 11:11.
U Pastor Pariat u la ong ba don lai jait ki paralok. Uba shu khot paralok, uba paralok uba kham jan bad u paralok uba hajan eh. U paralok uba hajan eh udei uba kit ba bah lem ia ki jingeh jingshitom bad u ba kmen lang ruh ha kapor ba kmen.
“U Jisu u dei u Blei, udei u paralok uba hajan eh uba kloi ban kit ia baroh ki jingkit bakhia ki jong ngi”, la ong u Pastor Pariat.
La pynlung mynsiem ruh ia ki riewgngeit da ki jingrwai choir na ki jingiaseng samla bapher bapher. Ha ka jingiaseng 10:30am, ka kynhun nongrwai choir na ka jingiaseng samla Balang, Moobakhon, Shnongpdeng, Laitlyngkot bad ka Balang Rattacherra bad ha ka jingiaseng nohphai sngi pat la ioh ia ka jingrwai na ka jingiaseng Samla ka Balang Mowtyrshiah, Standing Choir jingiaseng Samla KJP Synod Mihngi na ki Delegates bad kumjuh na ka Balang Mihmyntdu.
Ka jingiaseng samla KJP Synod Mihngi kaba khadhynriew kan long naduh ka 2 tarik haduh 4 tarik Lber 2018 haka balang Sutnga, East Jaintia Hills.