Shillong: U Myntri ki kam pohing ka jylla u James Sangma u la ong ba u la ioh pdiang ia ka jingthoh na ka liang ka sorkar jong ka jylla Punjab, lyngba u Myntri Rangbah ka jylla Punjab kaba u la thoh sha u myntri rangbah ka jylla, ha kaba ka sorkar Punjab ka la pynpaw ka jingsngewkhia halor kine ki jingjia.
Ka jingiakhih pyrshah Them Metor ka la jia shisnem mynshuwa hadien ka jingiakynad hapdeng u nongniah bos bad ki katto katne ki nongshong basa ha Them Metor.
Ka sorkar jylla lyngba ka High Level Committee ka la pynlong ia ka jingjurip katba ki jingdawa ban pynkynriah noh ia ki nongshong shnong ha katei ka colony. Ka Harijan Panchayat Committee ka la pyrshah ruh ia ka jingjurip ba la pynlong da ka Shillong Municipal Board.
Halor kane u Myntri Rangbah ka Punjab u Captain Amarinder Singh u la ai jingthoh sha u Myntri Rangbahduh, ka ri u Narendra Modi.
Ha ka sngi Balang jong ka taiew, ka 19 tarik u Jylliew, u Jasbir Singh Dimpa MP na Punjab u la ialam ia ka kynhun ba saw ngut ban iakynduh ia u Myntri ki kam Pohing ka jylla u James Sangma.
Kumta hadien ka jingiakynduh jong u Myntri ki kam Pohing ia kane ka kynhun, na ka liang jong ka sorkar lyngba u James Sangma u la ong, “Ngi la ai ia ki ka jingkular, ba ngin shimkhia halor ka jingshongsuk shong shngain jong ki paidbah Punjabi kiba shong ba sah ha Meghalaya.”
Naduh ba la jia ka jing huri hura halor ka Them Metor, ka kynhun jong ki para jaidbynriew Sikh na nongbah Delhi bad Punjab ka la wan jurip 2 sien sha nongbah Shillong bad ruh ban pynpaw ka jingsngew diaw halor kane.
Kumta na ka liang jong u myntri ki kam pohing ka jylla, u bah James Sangma u la ong ba ha broh kine ki kynti, u la kular ban khmih ba kan ym don kano kano ka jingiapher jaidbynriew bad ba ki briew bym dei ki trai paid riewlum ruh kim dei ban shongsyier hapoh nongbah.
U Myntri James Sangma u la pynpaw ba ka jingpynpur khana lamler kadei kawei na ki daw ba jur ki jingiakhih, kumta u la ong ba lyngba kum kine ki jingiakynduh ban iakren bad phylliew jingmut hapdeng ki nongialam ki paidbynriew Sikh bad ki nongialam Sorkar kan wanrah ka jingiasngewthuh jingmut bad ruh ka shong suk shong sain.
“Dei lyngba ki jingiakren ba ngin sa lah ban wanrah ia ka jingshong shngain hapdeng ki trai shnong bad ki jaidbynriew Sikh,” la ong u James Sangma ha kaba u la pynrem jur ruh ia kito kiba kynthah ding bad pynpur khana lamler.
“Ka jing pynpur khana lamler ka ktah shibun ia ka imlang sahlang bad ka pynshong syier ia kiba lui lui. Kumta nga kyntu ia ki briew ba kim dei ban leh kumta,” la pynkut u James Sangma.
Phi don ban ong eiei?