Shillong 03 Lber: Ki paidbah nongshong iew hapoh Iewduh, Shillong ha ka sngi nyngkong ka 03 Tarik u Lber 2025, ki la pynpaw ia ka jingsngew kmen hadien ba ka seng Voice of The People Party (VPP), ka la ioh ban synshar marwei hapoh Distrit Council.
Ia Kane ki paidbah nongshongiew ki la pynpaw haba iakren bad u nongthoh khubor mynta ka sngi.
Ha ka jingiakren bad ki nongshongiew, ki la pynpaw ba ka jingkyrshan jong ki ia kane ka seng thymmai ka VPP, kadei namar ba ki kwah ia ka jingkylla ha kaba iadei bad ka synshar khadar hapoh ka District Council.
Ki la pynpaw, ba ka jingsynshar jong kiwei ki seng saiñ pyrthei hapoh District Council ki la ngiah bad la thait khamtam ia kane ka sorkar kaba synshar mynta, bad ki don ka jingkyrmen tang ha kane ka seng VPP na ka bynta ka lawei jong ki paid nongshong shnong.
Kumba maki,ki la ai ia ka jingkyrshan bapura ia ka VPP banjopbha kane ka ilekshon MDC ba dangshu dep,ha kaba ki da kyrmen ruh,ba kane ka seng kan nym shet kylla ia u paidbah, hynrei kan iai trei hok na ka bynta ka bha ka miat ki paidbah jong ka Jylla hi baroh kawei. Nalor kata ki ong,ba khamtam eh ban wanrah ia ka jingsynshar ka ba khuid ba suba ka bym don ia ka jingleh shilliang khmat ne ka jing bamsap.
Haba ioh pat ban kylli na ki nongshongiew, ba kaei ka ba kidon ban ong, ha kaba iadei bad ka jingong u Chief Execitive Members (CEM) ba thymmai ka District Council, ban buh kathong, ban pynduna ka jingjingai trading license ia ki bar jylla bad kumjuh ruh ban wanrah ia ka ain thungkam thungjam ka ba khuit, na ka liang ki paidbah ki la pynpaw, ba ki da sngemen eh haduh katta katta lada leh shisha kumta, bad ki la khmih lynti ruh, ba ki khun samla trai ri trai muluk kin ioh shwa ia ki kam ki jam ym ban ioh da u bar jylla.
Shuh shuh ki paidbah ki la pynpaw, ba mynta ka kynti ki la kyntait noh ia ka seng Congress bad kiwei kiwei de ki seng, bad ban kyrshan noh ia ka seng VPP, ki ong, ba namar kine ki seng ki la thok la shukor ia ki paidbah ha kaba kim shym la pynurlong ia la ki jingkular baroh shikatta.
Phi don ban ong eiei?