Shillong:Wat la na ka liang u Vice Chancellor ka Skulbah NEHU u Prof PB Shukla u la mih na kane ka jaka pule, hynrei ka kynrum kynram hapoh kane ka skulbah ka dang bteng haduh kine ki sngi, hadien ba ki nonghikai bad ki samla ki la mih biang ban pynpaw ka jingpyrshah halor ka jingthung Pro Vice Chancellor ia ka Prof Sherwin M Sungoh ha Shilllong bad ka Prof Femiline K Marak ha Tura Campus.
Lah ban pynkynmaw ba ka kynrum kynram hapoh NEHU ka la sdang naduh ba la wan shimti ia ka kam Vice Chancellor da u Prabha Shankar Shukla, ha kaba la mih ki jingkynnoh ba une u VC u Pyniaid beaiñ ia kane ka Skulbah, kaba la bud da ka jingiakhih kaba la neh 5 bnai eiei bad ka jingmih noh u VC, lyngba ka jingshim shuti haduh mynta ka kynti bad ha ka 26 Tarik Lber 2026 la pynmih ia ka jingpynbna, ba la thung ia ka Prof Sherwin M Sungoh bad ka Prof Femiline K Marak kum ki Pro VC.
Halor kane haba ioh ban kren bad u nongialam ka North Eastern Hill University Teacher Association (NEHUTA) u Professor Lakhon Kma u la pynpaw ba ka jingkwah hi ka long ka Pro Vice Chancellor ka Skulbah NEHU ka Kong S M Sungoh kan hiar na ka shuki Pro Vice Chancellor bad kan shimti ia ka kam Acting Vice Chancellor ka NEHU.
“Halor kane nga la dep ban ong markhmat bad i Prof Sherwin M Sungoh ha shwa ba in shimti, ngi la dep ban long ka General meeting jong ka NEHUTA bad ngi la pynpaw ia ka jingbym pdiang ia kane jingthung Pro Vice Chancellor ia i namar ki khlem iaid kat kum ka aiñ, hynrei kum i nonghikai ba la slem ka ladei ka pali jong i bad i la dei ban shimti ia kane ka kam, hynrei ym dei kum ka Pro VC hynrei kum i Acting VC, bad ngi kloi ban treilang bad i baroh kiba don ha ka Skulbah NEHU khnang ba in lah ban shakri bah ha kine ki ar snem ba dang sah” u la ong.
U la bynrap “Ngi la dep ai da ka shithi sha i Prof Sungoh bad Prof Femiline K Marak bad lada im hiar na ka Shuki Pro VC, ngin sa shim da kawei pat ka lad ka lynti, hynrei ka jingkyrpad ia ki ba kin hiar noh na ka shuki shwa ban poi sha kata ka lynti, ngi kwah ba kin ieh ia kane ka shuki Pro VC bad shimti kum ia ka shuki VC ba pura, ban wanrah ka jingjaijai ha kane ka Skulbah bad lada im treh in hap ieh noh ia ka kam Pro Vice Chancellor bad ngin tyrwa noh ia kiwei ki Professor kiba hapoh jongi”.
U Prof Lakhon Kma u la kdew ruh ba ka jingthung ha NEHU hi ka long ban jied ia ki briew kiba la ai ka jingshakri kaba slem ha kane ka skulbah bad ki don kiba kham slem ha ka kam, hynrei ki khlem treh kumta ki la jied ia ka kong Sungoh, hynrei ka jingjied ka long kaba beaiñ kumta ym banse ban tyrwa noh sha kiba dang hapoh, lada kam treh ban ieh ia ka kam Pro Vice Chancellor kaba la thung beaiñ.
U la ong ruh ba ka jinghiar hi kane ka Skulbah ka long namar ba la ioh ia ki nonghikai kiba tip ia ka aiñ hynrei kim kwah ban bud ia ka, ha ka jingshisha ki dei ki nonghikai ki ban bah khlieh ia ka bha ka miat jong ka Skulbah, ym mano mano namar ki don bynta lang ha ka Academic Council bad ka Executive Council bad lada kim burom ia ka aiñ kumno kin pynbha ia kane ka Skulbah.
“Ngi dap da ka jingsngewsih namar ngi trei shitom ban pynbha pynmiat ia ka Skulbah, hynrei don na ki nonghikai khamtam kiba dei ki trai shnong kiba pynkhlain ia ki briew kiba wan nabar.Ka jingpyrshah ka NEHUTA kam dei ia ki briew ba shong ha shuki, hynrei ka don ka jingthung beaiñ ha kane ka shuki bad lada kim bat ia ka aiñ ka kanun ka jingiakhih kan dang neh beit kumne” u la ong.
Phi don ban ong eiei?