Ngi kyntait ia ka Congress, ka dei ka national parti, ong U Bah Metbah

Shillong:U Bah Metbah Lyngdoh, u lamphang ka ing dorbar Jylla, uba dei ruh u President rangbah ka United Democratic Party (UDP) u la kyntait ban ia synrop lang bad ka party Congress, da kaba ong “Ngin ym ia synrop lang bad ka Congress namar ba ka dei ka national Party.

“Kumba ka long hi mynta, ka jingia synrop lang kan long tang hapdeng ki party rilum ym bad ki party national, namar ba ki national party ki don la ki jong ki agenda katba ki party riewlum ki don la ka jong ki agenda” la ong u bah Metbah ha ki lad pathai khubor.

U bah Metbah u la ong ba na ka liang ka party kan trei shitom ban pynkhlain ia ka party, wat la kane ka long kaba jynjar, namar kane ka khlam, hynrei ban ia mynta hi ka party kan trei shitom bad shen ka party kan sa pyndep noh ia ka jingshna ia ka ophis jong ka party.
Haba ia dei bad ka jingpynkhlain ia ka party ha Ri lum Garo na ka liang u President ka seng u la ong “Ka jingsdang ban pyniakhun ia ki kyrtong na ka election MDC bad ka election shiteng samoi mynshem snem, ngi iohi ba ka don ka jingpdiang jong ki paidbah ia ka party UDP ha Garo Hills ruh bad kane ka la pynioh mynsiem ia ka party ba kan dang bteng ban buh kyrtong ha rilum Garo na ka bynta ka general election ha u 2023”.

U la bynrap ruh ba ka jingshah kynnoh ia ka party UDP, ba ka dei ka party tang na ka bynta ka Khasi Jaintia ka dei tang ka jingialam bakla jong ki katto katne ngut ki briew ha Garo, namar ba kam dei ka party tang jong ki khasi Jaintia, hynrei ka dei ka party Jong ka jylla hi baroh kawei.

U bah Lyngdoh u la ong “Ha ki por ba la dep ka party UDP, ka ju dei ka party kaba ju synrop bad kiwei ki party, namar ba kam ju ioh ia ka number kaba biang ha ka jylla ban wan ha ka bor, hynrei haba peit mynta la lai snem na ka jingioh jop ha ki election shiteng samoi ngi don ka jingkyrmen ka ba khraw ba ka party kan lah ban leh bha ha u snem 2023”.