Ngi kwah ban ioh noh ia ka VAB, ong ka SNSBH

Shillong, 31 Nailar:
Ka Synjuk ki Nong-synshar Shnong ka Bri u Hynniewtrep (SNSBH) ka la ong ba ka kwah ba ka sorkar bad ka KHADC ki dei ban pynsted ban pynioh noh ia ka Village Administration Bill (VAB) na ka bynta ki Rangbah Shnong.
Haba kren sha ki nongthoh khubor hadien ba la wai ka jingiakren bad u Myntri Rangbah u Dr Mukul Sangma, u President ka SNSBH u Dr Werlok Kharshiing u la ong, “Ngi kwah ban ioh noh ia ka VAB. Ngim tip la ka dei ka kam jong ka sorkar na ka KHADC”,.
U la ong ba u Myntri Rangbah u la ong ba un sa khot lang ban iakren ia kane ka kam hapdeng ka KHADC, SNSBH bad ka sorkar kumno ban pynsted.
Halor ka jingpan kyrteng ka sorkar ia ki nongtrei sorkar ba bat kam shnong, u Dr Kharshiing u la ong ba u Myntri Rangbah u la kular ban bishar ban pyrkhat biang ia ka rai kaba mut ba ka sorkar kan sa weng noh ia ka rai barim jongka.
“Ka sorkar ka la kular ban eksamin biang ia kane ka kam. Ngi la ong ba ka kam shnong ka iapher na ki kam sengbhalang namar ba ka shnong ka dei kaba la don naduh hyndai hynthai bad kam ju don kano kano ka jingpan kyrteng ne leh kumba leh kane ka sorkar ia ki nongkitkam shnong”, la ong u Dr Kharshiing.