Ngi kloi ban ai Volunteer lada ka KHADC ka donkam:HYC

Shillong,25 Naitung:
Tang mar ia ioh jingtip ba ki bar jylla ki la thombor ia ki pulit ka KHADC, kynthup ia ki nongthohkhubor bad ki riew paidbah kiba iaid lynti mynta ka sngi ha Iewduh, u samla Donbok Kharlyngdoh, u Convener ka sengbhalang ba dang shu thaw thymmai ka Hynniewtrep Youth Council (HYC) uba long ruh u President barim ka KSU Mawlai Circle u la hiar sha katei ka jaka ha Iewduh ryngkat ki dkhot ka HYC ban wan peit ia kaei kaba la jia, hynrei namar ka jingpoi dier por utei u samla u la ong ba ka seng kam lap shuh ia ka jingjia hynrei tang ia ki dukan kiba khang tala lut , kham hdien u la wan ban ai mynsiem ia ki pulit ka KHADC ryngkat ki nongthohkhubor ha ka jaka ba la sumar ia ki ha Civil Hospital.
U samla Donbok haba ia kren bad ki nongthohkhubor u la pynpaw ka jingsngewrem namarba ha Iewduh ka jaka kaba long ka pdeng jong ka sor Shillong ki bar jylla ki nud ban pyni bor haduh ba ki la nud ban thombor ia ki pulit ka KHADC kiba don ha ka Uniform,khamtam eh ka jingthombor ia ki nongthohkhubor. U la ong ba kitei baroh lehse ki la jia lyngba ki Master plan kiba jong u Paul Leong, kiba la pynkhreh lypa ia ki tiar ki tar ban pynmynsaw kaba u la ong ba ka dei ruh ka jingthmu ban pynjem rngiew ia ka jaitbynriew. U la ong ba na ka liang ka HYC ruh kan ia kynduh ia ki bor ka ain ban dawa ba ki dei ban kem bad pynshitom ia baroh ki briew kiba donkti ha katei ka jingjia.
Kham hadien ha ka jingiakren bad u Rupang u samla donbok Kharlyngdoh u la ong ba ka HYC, ka seng ba dang shu thaw thymmai ka kloi ban ai Volunteers lane ban ai briew kiba long ki dkhot katei ka seng lada ka KHADC ka donkam ha kano kano ka por ba kan pynlong biang ia kum kitei ki jingleit khynra ia ki dukan be-ain jong ki bar jylla.
U tei u samla u la pynpaw ka jingpangnud bad ka jingsngewkhia bad ha ka juh ak por u la ong ba ka HYC ka pynrem jur namar katei ka jingshah thombor kaba kynsan kynsan kaba ym shym la khmih lynti ba kan jia kumto ha Iewduh, u la ong ba katei ka jingshah pynmynsaw ki para doh para snam ka long kum ka jingshah pynmynsaw jong ki samla kiba ieit ia ka ri bad ka jaitbynriew.
Kham hadien u la iathuh ba na ka liang ka HYC mynta ka sngi ka la wan ia kynduh ia u SP, City bah Vivek Syiem ban kyntu ia ki bor pulit ban kem ia kiba donkti ha katei ka jingjia.