“Ngi ki Khasi, ngim don sap ban pule”

Shillong,
6 Nohprah:
“Ngi ki Khasi, ngim don sap ban pule” kren byn niaw U bah Kennedy Khyriem MLA ka Mawphlang, haba kren ha ka jingialang pyllait kot, hyn nin ka sngi.
“Kawei ka kotkhubor ka shang baroh shi bos, ka sla nyngkong sha khmat, ka sla lai shadien” ong utei u rangbah. Ula ong biang “U Khar Bangalee, 20ngut, 20 tylli ki kotkhubor”.
La ong biang da utei u rangbah, haba pyllait ia ka kot “Ka Thma U Kada” ba la thoh da U bah Apol Mawniuh. Utei u rangbah, u kren bynniaw biang, da kaba u iathuh ba u leit ha ka jingialang jong ki kmie ki kpa, ha kawei ka skul hynnin ka sngi hi bad ula lyngngoh ban iohi, ba ki don bun tang  ki kmie, katba ki kpa pat kim don bad hangta, ula kren bynniaw, ia ka jinglehsting jong ki kpa, na ka bynta la ki jong ki khun, ba kin leit ban don lang tang shisngi, na ka bynta ban pynshngain ia la ki jong ki khun bad u ong shuh shuh, ba ki kpa, ki lap miet ha kaba leit Fete, ki lap miet, haba leit phutbol, leit bam khana bad u ong shuh shuh “Wat ha ki jingiaseng ruh, u kpa u duna”.
U bah Kennedy, u iathuh shaphang ka jingiajan bha jongu bad u nongthoh, ha kaba u iathuh ba ki don lai ngut shi paralok, kiba ki iajan bha ha ka por ba ki dang don ha ka kam pulit, ha kaba u ong shuh shuh, ba kitei ki laingut, ki la mudui teng ruh ia ka tnat pulit, namar ba ka khanglad ha ka jing ia kiew kam kiew jam, ia kiba dei hok. U MLA, ula kren bynniaw ruh ba ki don ki dkhar, kiba don ha ka kam pulit, kiba kylla ialade sha ka jait khasi.
La ong shuh shuh da U MLA ba U Khasi, u wan sha ka pyrthei, da ka hukum bad katei ka long “Khie kamai ia ka hok” hynrei ha kajuh ka por, u kren bynniaw pat, la ka hok ka dang don ne em hangi mynta.
Ha ka jingkren U bah Apol Mawniuh, u ong “U pulit, uba duk tam dei manga, ngam ju pan na U Blei ia ka spah, nga pan ia ka jingkoit jingkhiah. Utei u rangbah, u kren bynniaw ruh, ia ka jinglong ki iing ki sem, ha kine ki sngi, ha kaba ula ong “Ha kine ki sngi, ki kha khun kynthei, na ka bynta u kada khlaw lane u khyllah jait” bad u kynthoh ruh ia ki shynrang ha kine ki sngi, ha kaba ki don ha ka jingmut tang ban shu pynkha khun bad lada ka dei ha katei ka dur, u ong “Um dei shuh u longkpa, ula dei noh u langkpa”. U nongthoh u ai nuksa shaphang ki jaitbynriew Jew, ha kaba u ong ba ki la long mraw 40 snem ha Ijipt, 70 snem ha Babilon bad saphret 1878 snem kylleng ka pyrthei, hynrei kim shym la duh jait satia, namar ba kim shongkha khleh.
Ha ka jingkren pat U bah SA Kurbah, uba dei U shongknor jong ka Skhem Rympai Tynrai (SRT), ula kynthoh ba ba ki don 40 percent, kiba ia phet tnga na ka daw jong ka kyiad, katba ki don pat 45 percent, kiba ia phet tnga na ka daw jong ka kyiaw.