Ngi ju plied ia ki rukom pyniaid dorbar U Bah Kyndiah, ong U Mandal

Shillong, 23 Nailur:
“Haba don ki jing ia tynjuh bor ha iing dorbar, ngi ju peit ia ki por pyniaid dorbar jong U bah PR Kyndiah” ong u lamphang dorbar Jylla ba mynta, U AT Mandal, haba kren ha ka jingialang pyllait kot mynta ka sngi.
U Abu Taher Mondal, u pyllait mynta ka sngi, ia ka kot, kaba kyrteng “PR Kyndiah – As I Know him” ba la thoh da U bah Andrew Simon, uba dei ruh U Commissioner & Secretery ka iing dorbar Jylla.
La ong U Mandal, ba ka kyrteng jong U bah Kyndiah, ka la dei ban don ha ki dak ksiar bad u iathuh ruh, ba katei ka dei ka kot, kaba la thmu ban pynmih, naduh ka por, ba u dang im utei u lamphang dorbar barim, hynrei ki don ki daw, ki bym lah kiar, kiba la khanglad ban pynmih ia katei ka kot ha kitei ki por, ba u dang don U bah Kyndiah.
U Mandal, u iathuh ba U Bah Kyndiah, ula long bunsien, u dkhot ka dorbar jylla, nangta, ula long U Lat ka Mizoram bad nangta, ula long u dkhot sha Lok Sabbha, ha kaba u la long ruh u myntri jong ka sorkar India.
“Ha ka por ba nga shimti kum u lamphang dorbar, U Bah Kyndiah, ula phah ktien, ba u kwah ban ia kynduh ianga” ong U Mandal. “Nga la leit bad nga la ioh shibun ki jingtip na u” bad u iathuh ruh, ba ha ki por, ba ka don ka dorbar ia tynjuh bor ha iing dorbar “Nga ju leit sha kito ki sngi, ba u pyniaid dorbar U bah Kyndiah bad ki long kiba ioh jingmut shibun” ula ong shuh shuh.
U Mandal, u ai jingmut ia kito kiba kwah ban long nongmihkhmat ha ka dorbar Jylla, ba kin pule ia katei ka kot.
Ha katei ka sngi, la pyllait ruh ia ka kot kaba la ai kyrteng “Meghalaya” ba la thoh da Ka Prof Phibankhamti Ryngnga bad U Prof Siddeswar Sarma bad katei ka kot, ka dei kaba iathuh shaphang ka jinglong jong ka Geography, ka jinglong ki jaka ha sor bad ha nongkyndong bad ka dei ruh kaba batai shaphang ki jaka shangkai pyngngad bad ka dei ka kot, ka ban pyn myntoi shibun ia ki samla pule bad ia ki riew wad bniah ha ka pule puthi shaphang ka Jylla, ong U Mandal.
U Bah Andrew Simon lem bad ka Prof Phibankhamti Ryngnga ruh, ki la kren lyngkot, ha kaba batai shaphang ki thup, kiba don ha kitei ki jingthoh jongki.
U Bah Andrew, u iathuh ba ka jingpynmih ia katei ka kot, ka dei hadien ka jingtrei shitom jongu, kaba la saw snem kynthih ban pynkhreh shaphang ka jingim bad ka jingtrei jong U bah Kyndiah, kum u lamphang dorbar Jylla.