Shillong:Ka VPP kan shna ïa ka rynsan jong ki paidbah namar la thaw ïa ka VPP na ka bynta ka hok bad ka jingshisha ban pynshai ym ban kynthoh. Ka VPP ka mih namar u pud u sam, ka land transfer act, ka jingïohi jngai, ka don ka nong rim, ong u kyrtong ka VPP ka 17 North Shillong Konstitwensi u Bah Adelbert Nongrum ha ka jingïalang paidbah ha YMCA ha Mawkhar.
“Ki ong ba u Bah Rit u dei uba bieij, hynrei nga ong ba la sei ïa nga ban pynlehraiñ ïa kiba stad. Kane ka dei ka por ba hap ai jingsneng ïa kane ka MDA. Kiwei ki parti ki la ïoh ïa ka bor hynrei ki khlem leh eiei ïa ka Reservation policy, ka UDP kaba ailad ïa u Conrad Sangma ban long u Myntri Rangbah wat hadien ba la ïakren ban long Myntri Rangbah da u Khasi hynrei sdang ym pat sdang lah shet kylla bad ai pynban ïa u Conrad, baroh kiba don ha ka MDA ki dei kiba kut ha u PP suda kumta ki wan lehkai ïa ka jaitbynriew,” ong u Bah Adelbert.
U la ong ba baroh ki parti ki kwah tang ban jop ilekshon ym ïa ka Generation. “Ka VPP kam ngeit ha ka ktien hynrei ha ka kam kumta ka nongrim ka VPP. Watla nga long marwei mynshwa hynrei ka jingkhlaiñ kam shong ha ka jingbun briew, 50 snem ki khlem long ki nongthaw aiñ hynrei tang ki nongthaw pisa, ki khlong lut ïa ki marpoh khyndew bad mih bluit ki High Level, ki ong ba u Bah Adelbert udei uba ïam bait te balei pat maki ha ki 50 snem ki khlem ïam hap ïam da u Bah Adelbert na ka bynta ka lawei ka jaitbynriew,” u la ong.
“Nga khlem leit ïuhkjat ha them ïew Mawlong namar ngam kwah ban die ïa ka jaitbynriew namar nga wad ïa ka rai jong u paidbah. Ha kane ka ilekshon ha ka sngi leit thep vote rai da ka jingshit rhem ym da ka jingshong shit. Ai ka bor ha ka VPP kan tohkit ïa baroh ki bamsap, ki kam lehbor bad kiwei ki kam sniew,” u la ong.
U la ong ba u sngewkmen ba ki paidbah ki la jied ïa u kum u MLA namar u khlem long u Ksan rympei ne rem Dorbar ne u kup snieh langbrot.
“Ka por ka la dei ban sei ki nongthaw aiñ ym ki nongmihkhmat, ki nongthaw aiñ ki bym shet kylla, bym kynriah nongrim, ki bym ïapeiñ ïa ka shuki na ka bynta ka jaitbynriew bad bym ïapeiñ ïa ki bar jylla lada kim burom ïa kiwei,” u la ong da kaba bynrap ba ka Roster System la wanrah da ka kynthei na Garo ym ma u.
U la ïathuh ba ha ka ilekshon ba la dep kumba 11 hajar ngut ki khlem leit thep vote kumta u la kyrpad ba ki nongshong shnong ka Konstitwensi ban ïamih leit thep vote ha ka 27 tarik mynta u bnai.
Ha kane ka jingïalang ki paidbah nongkyrshan ka VPP ka 17 North Shillong Konstitwensi ki la tuid da ki hajar ngut bad ban shad kmen ruh ïa ka jingrwai Kongdeng Kongnah ha u Prah. La ïoh ruh ka jingkren na u Bah Ardent Basaïawmoit, Bah Maybon Lyngdoh bad kiwei kiwei.
Kaba phah nongmih khmat bad phah nongthaw ain ka iapher bak- ly- bak.To ngin phah da ki nongthaw ain ki ba pyrkhat na ka bynta ka jingbha jong ka state bad ruh na ka bynta ka jait bynriew Khasi.
nga ruh nga mynjur iakata. to ai ba line ki ba shu mihkhmat ai kin ioh is u soh ka jingrem kput