Ngi don ka jingkyrmen kaba skhem ban jop, ong u Dr Jemino

Shillong: Hadien sa shi bnai ban ioh ia ka resol jong ka jingiathep vote ha kane ka MP elekshon, u kyrtong monlang ka Meghalaya Democratic Alliance (MDA), u Dr Jemino Mawthoh u la pynpaw ia ka jingsngew skhem ban ioh ia ka jingjop.
Lah ban kdew ba ha u snem 2014, ka UDP kaba pynieng ia u bah Paul Lyngdoh ka ioh 106806 vote, u PBM Basaiawmoit uba ieng shimet u ioh 168961 vote, katba u bah Vincent H Pala uba jop n aka Congress u ioh 209340 vote, katba u bah Shibun Lyngdoh na ka BJP u ioh 95979 vote. Baroh kiba wan thep vote ki long 620041 lak ngut.
“Kaba paw nalor, nabar, ngi don jingkyrmen ban jop hynrei ym tip ia ka jingmut ba shapoh jong ki briew”, la ong u Dr Jemino haba iakren mynta ka sngi.
Haba kyntait ba kan don ka jingleh arsap ki paralok ka MDA, u Dr Jemino, u la ong, “Ngi don ka jingskhem ban wanrah ia ka roi ka par. Ngi kwah ba ka sorkar kan skhem”.
Katkum ka jingong u Dr Jemino Mawthoh, ka jingmih jong u kyrtong monlang ha kane ka kynti, ka thew sha ka lynti jong ka jingiatylli ki seng riewlum ha ka jylla, kaba long ka dak jong ka jingbha na ka bynta ka lawei ia ka jaitbynriew.
“Ka lynti ka la plie ban iatylli, ym dei ban duh jingkyrmen.Ki paidbah kila shai, kila sngewthuh”, u la ong.