Ngi dei ban pan map ia ka jingkular map ram U Rahul, hapoh shiphew sngi, ong U MLA Congress

Bhopal: U Lakshman Singh, MLA jong ka seng Congress, uba dei u hynmen jong U Digvijaya Singh, nongialam ba rangbah jong ka seng Congress, hynnin ka sngi, ula kynthah, da kaba ong ba U Rahul Gandhi, um dei ban kular ban siew ram hapoh shiphew sngi ia ki nongrep ha ka Jylla Madhya Pradesh. Katei ka dei kaba U Rahul, ula kular ha shwa ka elekshon sha ka dorbar Jylla.

U Lakshman Singh, u ong ha ka jingiakren bad ka News 8 bad ka jingkular jong U Rahul, ka long ka bym lah satia ban pyn trei kam.

“Ban map ram kaba shongdor T.45,000klur hapoh shiphew sngi, ka long ka bym lah long satia, hynrei namar ba ula kular paidbah, kumta ngi dei ruh ban pan map na u paidbah ka Jylla” ong utei U MLA ka Chachoda. “Lada ngim lah ban pyn urlong ia ka jing kular jongngi, kumta ngi dei ban pan map na ki paidbah” ong U Lakshman, da kaba ong ruh ba ka sorkar jong U Kamal Nath, ka dei ban kular, lano kan map lut ia ki ram jong ki nongrep.
U nongkren jong ka seng Congress, U Bhupendra Gupta, u ong ba U Lakshman Singh, um shym la kren eiei satia ia kane ka mat ha ka sorkar bad U Gupta, u ong shuh shuh “Ka dei ka jingshisha, ka jingkren jong U Rahul Gandhi, ba un map ram ia ki nongrep hapoh shiphew sngi, katba u myntri rangbah, ula pyndep tang hapoh shi kynta shiteng”.