Shillong: U myntri ka tnad pynroi sor uba dei ruh u Working President ka PDF u bah Hamlet Dohling u la ong ba ka PDF ka ieng ha ka nongrim da kaba buh ia kajaitbynriew hakhmat bad ka sorkar hadien bad u la ong ba ka PDF kam pdiang da lei lei ruh ia ka Citizenship Amendment Bill, 2016 bad u la dawa ba u myntri rangbah ka jylla u Conrad K Sangma u dei ban khot kyrkiehnoh ia ka jingialang ki Party kiba don hapoh ka kynhun jong ka sorkar MDA.
“Ngi buh ia ka jaitbynriew hakhmat, ka sorkar hadien, u myntri rangbah u dei ban khotmar mar ia ka jingialang kyrkieh jong baroh ki Party kiba don hapoh ka sorkar MDA ban ia kren ia kane ka kam” ong u bah Hamlet Dohling haba ia kren bad u Rupang. Utei u MLA ka Mylliem konstitwensi uba dei ruh u General Secretary barim ka KSU u la ong ba ka Joint Parliamentary Committee (JPC) kaba la wan sha nongbah Shillong kam shym la sngap ia ka sur kaba mih na kane ka jylla hynrei ka la mynjur beit beit ia katei ka bill khlem da kheiñ snep, nalor kata u la ong ba ka kynhun myntri sorkar jong ka sorkar pdeng ruh ka la mynjur bad mynta lei lei la mynjur syndon ia katei ka bill hapoh ïng Dorbar bah ka Ri ha Lok Sabha.
“Ngim pdiang da lei lei ruh ia katei ka aiñ kaba buh hapdeng ka jingma kaba khraw ia ka jaitbynriew” ong u bah Hamlet haba pynrem ia ka BJP bad ia ka sorkar NDA. U la iathuh ba ka jingleit kyrshan ka PDF ia ka sorkar MDA ka dei beit halor ka nongrim ba ka NPP kan ialam ia kane ka sorkar bad ba ka NPP ruh ka la ieng skhem naduh nyngkong ban pyrshah ia kane ka Bill. Halor ka jingdon bynta lang jong ka BJP hapoh ka sorkar MDA u bah Hamlet u la ong “Dei na kane ka daw ba ngi kwah ba u myntri rangbah un khot noh mar mar ia ka jingialang jong ki Party kiba don hapoh ka MDA”.