Ngi buh ïa ka St. Xavier ban kyntiew pule puthi, ong U Rev. Victor Lyngdoh

Shillong: U Lyngdoh Sad (Archbishop) Ka Jyllaniambah Shillong U Most. Rev Victor Lyngdoh u la pynrem jur ïa ka jingshah thombor bad shah hiar thma ki nongbylla ha Umoid, South West Khasi Hills haduh ba uwei u la khlad noh bad kumba 8 ngut kiwei pat ki la mynsaw jur.

Ha ka kyrwoh khubor, U Lyngdoh Sad u la pynpaw ïa ka jingsngewsih halor katei ka jingjia.

U la ong ba ka Balang Katholik ka lah buh ïa ka St. Xavier’ College na ka bynta ban kyntiew ïa ka pule puthi ha ka thaiñ.

U Lyngdoh Sad u la ong ruh ba u donlang bad ka rai jong ki bor pynïaid ka kolej ban sangeh shwa ïa ka jingtrei tat haduh ban da poi sha ka jingïapynbeit halor katei ka kam.

Lah ban kdew ba kumba 5 ngut ki briew ki la shah kem halor ka jingkynnoh donkti halor katei ka jingjia bad ka jingtohkit ka dang ïaid shaphrang.

Ha kawei pat ka liang U Lyngdoh Sad u la pynpaw ïa ka jingsngewnguh ïa ka Sorkar bad ki bor pynïaid Shnong halor ki jingkloi jong ki ban shimkhia bad ban ïarap lem halor katei ka kam.