Ngeit bieit halor ki ksuid ki khrei:Bah Hom

Shillong, 20 Nailar:
U bah WHD Syng kon Rangbah Shnong ka Mawkhar, uba long ruh U Additional Advocate General, ula pynpaw ba ka jingmutdur hamsaia ne ngeit bieit halor ki ksuid ki khrei, ki jingai bih ai sniew bad ka jingdon thlen ne menshohnoh, kim ia dei shuh bad ki por kiba mynta, namar kitei baroh, kum ban shu ong, ki la rung lut khoit ha man la ka met, ka mynsiem bad ka jingmut jingpyrkhat jong uwei pa uwei u briew.
Ban iakhun bor bah ia kum kitei ki jingjia ba sngewsih, ula pynpaw, ba dei ban don noh shisyndon ia ka ain kaba pura, kaba yn lah ban teh lakam ia kum kitei ki jingjia ba sngewsih, kiba ju jia khah khah man la ki por ha ka bri jong u hynniewtrep. Ula pynpaw ruh ba lyngba katei ka ain, dei ban ai bor ha ki nongpyniaid shnong, ba kin ioh lad ba kin ia khun pyrshah bad ban teh lakam ia kum kitei ki briew, kiba shim kabu ia kiwei pat tang halor ka jingmutdur bad ka jingkynnoh, ba dei ki menshohnoh ne ki nongai ksuid ne ki nongai bih ai sniew.
U bah Syngkon, u pynrem jur ia kitei ki riew thrang snam, ki riew khlem khein snep shuh ia ki mynsiem briew bad u pynpaw ruh ia ka jingkyrpad ba sngewrit, na ka liang ka jongu, sha ki tnat treikam jong ka jylla, kiba dei ban peit ha katei ka bynta, ba ki dei ban ai ka jingpynshitom kaba tyngeh, kat kum ka lynti jong ka ain, ba kan long ka nuksa ia kiwei pat hadien ha bud.