Ngat u heh pulit ha phatok ba jrong kti ia ka pulit

Shillong, 15 Naitung:
U Assistant Commandant ka 2nd battalion u Gilbirth Marak ha kane ka sngi Hatmajai u la ngat ha ka shrip ban shah shong phatok 14 sngi hadien ba u la shah kynnoh ba u jrong kti ia kawei ka pulit kynthei ha Goeragre ha West Garo hills district. Ia u Marak la kem ha kane ka sngi u Blei hadien ba kawei ka pulit kynthei ka la ujor ejahar pyrshah ia u halor ka jingkynnoh ba u la jrong kti ia ka.
Ia ka ejahar la ujor ha Tura police station ha ka janmiet sngi Saitjain da kawei ka pulit kynthei kaba dang shu ioh rung. Katkum katei ka pulit kynthei, la kynnoh ba u Marak u la khot ia ka ha jaka sah jongu kaba don ha phyllaw ka 2nd Battalion ha Goeragre bad pyrshang ban jrong kti.
Kane ka jingjia ka la long haba ki pulit kynthei kiba dang shah hikai ha kane ka battalion ki dang ia bun kam, bad katei ka pulit ka la shah khot ha une u heh pulit.
U commandant ka 2nd Meghalaya police battalion u Aditya Goenka u la ong ba kane ka pulit kynthei ka la wan ujor sha u ia kane ka jingjia bad u la ai jingmut ban ujor da ka ejahar pyrshah ia utei u heh pulit.
Hadien ba la ujor ejahar, une u heh pulit u la shah kem noh ha ki pulit hi bad u la shah set 14 sngi ban tohkit bad la pynsangeh ruh na ka kam.
U Marak u la shah pynkiew kyrdan kum u Assistant Commandant watla um pat dei u MPS. U la don hapdeng ban sa shong thait shen. U Goenka u la iathuh ba u la pyntip ia kane ka kam sha kiba heh sha Shillong kiba shim khia ia kane ka kam.
Ki pulit ka Tura ki la rejister ia kane ka jingjia katkum ka kyndon 354, kaba iadei bad ki kam runar pyrshah ia ki kynthei nalor kiwei ki kyndon.
La shu ioh jingtip ba u Marak u la buaid ha katei ka por ba u leh ia katei ka kam beain.