Shillong 10 Ïaiong: Ka Voice of the People Party (VPP) ka la ngat ha ka show cause notice ha ka tnad Ilekshon, halor ka jingkynnoh ba ki nongkyrshan ki la leit pynthud ia ka jingialang ialap ilekshon ka seng National People Party (NPP).
U Returning Officer (RO) ka Shillong Parliamentary constituency, ula phah ia ka show cause notice sha u President ka VPP Bah Ardent Millar Basaiawmoit ban pan jingshai lane hashuwa ka 12 tarik mynta u bnai Iaiong,ba balei ba ym dei ban leh eiei pyrshah ia u kat kum ki kyndon jong ka Model Code of Conduct (MCC).
Kat kum kane ka show cause notice, u Returning Officer mynta ka sngi u la pyntip, ba ula ioh pdiang ia ka jingujor ha ka 9 tarik u Iaiong 2024, ba ki Nong kyrshan ka Voice of The People Party (VPP) kila leit ban hylla iaka slogan bad pynthut ia ka jingialang ialap elekshon jong ka party NPP ba long ha ka 8 tarik Iaiong ha Jaiaw, kaba la pynlong ia ka NPP ban pynsangeh noh shwa ia ka jingialang.
Haba pyntip ba ka Election Commission of India (ECI)kala pyntreikam ia ka Model Code of Conduct (MCC) jong ka elekshon Lok Sabha naduh ka 16 tarik Lber 2024.
U Returning Office ula ong ruh, ba ka ModelCode of Conduct kala buh kyndon ia ki seng sain pyrthei bad ki kyrtong ba ong “Ki seng sain pyrthei bad ki kyrtong ki dei ban pynthikna ba ki nongkyrshan jong ki, kim dei ban pynthut ha lane ban pynthut ia ki jingialang ne ki jingiaid procession jong kiwei pat ki seng sain pyrthei”.
“Ki nongtrei ne nongiarap jong kawei ka seng sain pyrthei, kim dei ban pynmih jingkulmar ne pynthut ia ki jingialang ialap ilekshon bala pynlong da kiwei pat ki seng sain pyrthei da kaba buh jingkylli ia ki kyrtong lane ai da ka jingthoh lane sam kot lyngkdop jong ka seng sain pyrthei lajong”.
“Ym dei ruh ban pynlong ia ka jingiaid procession da kawei ka seng sain pyrthei ha ki jaka ba long jingialang jong kiwei pat ki seng sain pyrthei. Ym dei ruh ban weng ia ki poster bala tah da kiwei ki seng sain pyrthei da ki nongtrei jong kawei pat ka seng sain pyrthei”.
U Returning Officer ula ong ruh, ba kumta, haba ailad ia phi ban ioh ia ka jingbishar, la bthah ia phi ban jubab ia ka show cause ha lane hashuwa ka 12 tarik u Iaiong, ba balei ba ym dei ban leh eiei pyrshah ia phi (Ardent M Basaiawmoit) hapoh ki kyndon jong ka Model Code of Conduct.
Phi don ban ong eiei?